Liztor aldizkaria

2010-05-24T13:06:00.000-07:00

LA SALLE JAIAK 2010!

2010-05-24T10:45:00.000-07:00

Eneritz Azqueta (DBH 4)

Urtero ikasturtea bukatzear dagoenean, salletar guztiak irrikatzen gaude eskolako festak ospatzeko eta eskolaren umore onaz gozatzeko. Aste osoan zehar, klase orduetako azkenekoa galdu genuen zenbait kiroletan jokatzeko. Nabari egin zen , nola klase bakoitzak, taldean jokatzen saiatzen zen lehen postua irabazteko; honi esker, ostiralean irakasleen kontra jokatu ziren finalak.

Horretaz gain, asteko arratsaldeetan hainbat ekitaldi berezi antolatu zituzten: Ikasleen kontzertua, aerobitona, dantzaldia, etab. Esan beharra dago, aurten dantzaldia hobeto antolatuta egon dela. Musika oso ona izan zen eta guztiei gustatu zitzaizkigun sarrerarekin eman zizkiguten eskumuturrekoak. Nire ustez, hurrengo urterako aldatuko nukeen gauza bakarra argi gutxiago egotea izango litzateke.

Ostirala egun bereziagoa izan zen; ez zen klaserik eman. Goizean zehar tailerretan egon ginen. Hamaiketakoa izan ondoren, herri kirol txapelketa eta ginkana egin ziren. Ginkana eskolan nolakoa izaten den denok dakigula uste dut, oso dibertigarria eta nazkagarria aldi berean. Batxilergoko ikasleek antolatu zuten guztia eta honetan parte hartzeko, lotsa guztia kanpoan uztea baino ez zen behar.

La Salle jaiei bukaera emateko, urtero larunbatean egin ohi den ospakizuna egin zen. Egun osoan zehar jarduera asko egon ziren. Baina eguraldiak ez zigun asko lagundu. Ala ere, ikasle, lagun, eta guraso dexente egon ziren gaueko festan.

Eskolako jaia oso ondo datorkigu ikasleoi azterketen aurretik pixka bat lasaitzeko eta ikasturtea ahal den hoberen bukatzeko.

ESKERRAK EMATEKO GARAIA

2010-05-23T07:42:00.000-07:00

Sonia Fraile Sánchez (2. BATX)

15 urte...
180 hilabete...
720 aste...
5.040 egun...
129.960 ordu...
7.257.600 minutu...
435.456.000 segundo...

... eta milaka momentu elkarrekin.

Aurten bukatzen da askorentzat 15 urtetan zehar idatzitako istorioa.
Orain dela gutxi eskolako liburuxka hartu nuen nire gelako argazkia ikusteko asmoz, eta bazirudien inoiz ez nintzela orrialde horretara iritsiko. HH 2, ..., HH 5, LH 1, ..., LH 6, DBH 1, ..., DBH 4, BTX 1 ... eta hortxe, amaieran, 101., 102. eta 103. orrialdetan, BTX. 2.
Egia da, bai, luzea izan da egindako bidea; haur hezkuntza hasi genuenetik hainbeste denbora pasa izana gezurra dirudi...

Horrela, esker oneko egunean, guztiok elkarrekin gogoratu ditugu txikitako anekdotak, eta ez hain txikitakoak ere bai.

Inoiz ez ditugulako ahaztuko bustitzen ginenean Karmelek jartzen zizkigun galtzak, ezta mantalen erabilera ezberdinak ere. Guztirako balio zuten... Mikel eta Enararen, eta Aaron eta Ainhoaren ezkontzetan erabili genituen, baita kaiolan egiten genituen San Ferminetako entzierroetan ere.
Aurrerago, bihurrikeriak aurkitu genituen, eta horiekin garai haietako zigorrak ezagutu genituen: “eskuak buru gainean!!”, “errekreorik gabe!!”, eta horietakoak.

Eta DBHra iritsi ginen, txirula atzean utziz Lorearen xilofonoa hartzeko. Nork ez ditu gogoratzen Ingeleseko aditz irregularrak Ricardorekin klase eman ondoren? Eta Barriako amodioak?

Denbora igaro zen, eta DBHn Iñigo Villar-en “se me ha caído”-tik (sabaian zintzilik zegoen arkatzari begira), BTXn Igor-en “yo de mayor quiero ser mongologo”-ra pasatu ginen.

Eta orain, bukatzear gaudela, iritsi da garaia eskerrak emateko:
gurekin egon diren ikaskide guztiei, txikitatik egon direnei, bidean geratu direnei edo bukatu gabe utzi zutenei, eta baita beranduago etorri direnei ere.

Eta ez ditugu ahaztu behar pertsona bezala zer edo zer irakatsi diguten irakasle horiek...

Beti gogoratuko ditugulako Jaioneren gogoetak... beti zer pentsatu ematen dutenak eta bakoitzak bere barnetik bere sentimenduak ateratzeko balio dutenak...
Bearen “Que una peina muchas canas”, edo gogoetetan... “errepikatu azken esaldia”, “errepikatu”, “errepikatu”, eta horrela bost edo sei aldiz...
Yolandaren hurbiltasuna, beti edozertan laguntzeko prest...

Imanolen gauzak esateko era, badirudiela ez dagoela ezer esaten ari, baina benetan dena esaten duela; bronka botatzea baino eraginkorragoak direlako bere hitzak...
Juanen “apuntatu, apuntatu! Ez nagoela konferentzia bat ematen ari!!”, eta garrantzitsuagoa dena, beti leku guztietan egoteko duen gaitasuna. Edozein arrazoirengatik triste, desilusionatuta, haserre... bazaude, momentu horretan beti bera agertzen delako zu entzuteko prest eta lasaitzen lagunduz.
Goitizenak, made in Periko: “Willy”, “Lupi”, “Cerro”, “SoniA eta SoniB” (edo berdina dena, “Zipi eta Zape”); eta bere esaldi eta abesti tipikoak: “If I were a rich man”, “esto es una chorradilla de Beethoven”, “aix... me bibra el pecho y no es por amor”... eta ez ditugu ahaztu behar bere kalkuluak... “gutxi gorabehera...” eta kurtsoa amaitu dela eta oraindik ez dakigula nola egiten duen beti erantzun zuzena asmatzeko!! Baina benetan eskertzekoa dena berak duen bihotz handia da, egiten dituen gauza guztietan jartzen duen ilusioa. Harritzekoa delako beti klasea emateko etortzen den gogoarekin, jartzen duen ilusio horrekin kutsatu egiten gaituelako. Edozer gauza esaten duela, badirudi gauzak aurrera ateratzeko indarrik ez zegoela uste genuen lekutik indarra ateratzen dela...

Gauza horiek guztiak ezin direlako ahaztu, ezinezkoa da, gure barruan zerbait aldatu dutelako. Eta hauek irakasle gutxi batzuk dira soilik, beste asko badaude gugatik gauza handiak egin dituztenak eta testu honetan ez direnak agertzen...

Beraz, aprobetxatu duzuen aukera, gure kexen gainetik badirelako benetan onak diren gauzak. Gelditu pixka bat, eta begiratu zuen ingurura, irakasle onak dituzue, eta pertsona hobeagoak.

Gurekin bide hau ibili duzuenei, eta aurrera jarraitzeko animatu gaituzuenei:

------------------------- MILA ESKER! ------------------------

Hemen pasatu ditugun urteak ahaztezinak izatea lortu duzuelako...
Gure desirarik onenak denentzat!!

3. KAPITULUA

2010-05-23T07:27:00.000-07:00

Berriro, nire logelan burutik zure irudia kendu ezinean nire arrazoiak zure perfekzioaren existentzia dudan jartzen hasten zen, baina zu existitu behar zienen, sentimendua indartsu hauek existitzen ziren nire barnean, beraz zu existitzen zinen; ezin nuen beste gauzarik onartu.

Egoera horretan atera nintzen kalera, ezinegoneko putzu batean sartu, zure begiak bilatzen zureak ez zinen aurpegi guztietan. Zer uste nuen, zu batean agertuko zinela nire ametsetan bezala?

Bueltaka ibili nintzen egun osoa, parkean, hondartzan, eta ezagutzen eta ezagutzen ez nituen leku guztietatik, baina zu ez zeunden, benetan erreala al zinen? Agian nire bakardadearen emaitza zinen, nire ezkutuko sentimenduen emaitza, niretzat bakarrik egindakoa, nire burua egindakoa.

Hori egia bazen, nire bihotzaren azkenengo maitasun taupadak gure ametseko hondartzan gertatu ziren, izan ere, zu ezagututa, ezingo nuen beste inor maitatu, gutxienez zu maitatu zintudan bezala. Nire bizitza zure ezpainetan bukatu zen, hortik haurrera sentimendurik gabeko gorputza izango nintzen.

Pentsamendu horretan murgildurik, nire ingurua begiratu gabe, bueltaka segitu nuen hirian barrena. Bat-batean, abisurik gabe, lore usainak bildu ninduen, ezinezkoa zen, oraingoan ziur nengoen, esnatuta nengoen, baina, egia zen, burua altxatu nuenena hor zeunden, niri begira eta zure irribarre perfektuarekin, benetakoa zinen!

Dena dela, zugana poliki hurbildu nintzen, oraindik posiblea zen nire buruaren burutapen bat izatea bakarrik, baina zu ukitzean eta barruan nuen maitasun sentimendua handitzean, konturatu nintzen benazko zinela eta oraingoa, ez zela egongo ez eguzkirik ez urik gure amets erreala amaitutzat emateko.

2008-06-03T06:22:00.000-07:00

KLIK EGIN IRUDIEN GAINEAN

Dantzaldiko argazkiak

2008-05-14T08:13:00.000-07:00

KLIK EGIN IRUDIEN GAINEAN NEURRI OSOAN IKUSTEKO

DANTZALDIKO ARGAZKIAK!!!!!

2008-05-09T23:06:00.000-07:00

Aurki gure blog-ean dantzaldiko argazkiak

Portada

2008-04-21T10:14:00.000-07:00

Editoriala "Belaunaldi baten agurra"

2008-04-21T09:05:00.000-07:00

2006ko irailean erabaki genuen Liztor aldizkariari berriz hasiera ematea. Eskolan halako aldizkari baten beharra sumatzen genuelako egin genuen, gure usteak, kezkak, etab. azaltzeko beharra zegoela uste genuelako. Orain, 2008ko apirilean agur esateko ordua iritsi zaigu BTX 2ko liztorkideoi (Ander Edo, Oier Izulain, Rodríguez doktorea, Iker Pedrosa eta Aitor Ulangari). Eskertza berezi bat egin nahi diegu, lerro hauen bidez, Liztorren bi urte hauetan zehar idatzi duten beste idazleei eta Aitor Oiarbideri, bere laguntzarik gabe Liztor ez litzatekeelako aurrera aterako. Baita ere, noski, gure zenbakiak hartu dituzten irakurle guztiei, eman diguten babesagatik.

Hurrengo urtetik aurrera Liztorrek jarraitzea zuen esku dago. Guk Liztorrekin jarrai dezazuen nahi dugu, baina hori ez dago gure esku. Garrantzitsua izango litzateke, gure ustez, Liztorrek aurrera jarraitzea, ikasleon ahotsak eskolan bere lekua izan dezan eta euskara bultza dadin. Zuei dagokizue erabakitzea!

ESKERRIK ASKO LIZTOR POSIBLE EGIN DUZUEN GUZTIOI!

Tapoia records

2008-04-21T09:00:00.000-07:00

Obsesioa bihurtu da jadanik, tapoi bat ikusi eta segituan patrikara sartu, sukaldeko olio, fairi edota garbikariaren botila bukatu eta hortxe dago La Salleko ikasleren bat (edo irakasleren bat) tapoi horren zelatan.

Duela gutxi hasi zen ekimen berri hau gure ikastetxeko gela guztietan. Badirudi tona bat tapa bilduz gero, ezinduentzako gurpildun aulki bat lortu daitekeela. Ekintza bitxia da benetan eta harrera ona izan du gurean. Hala eta guztiz ere, alde handiak izan dira partaidetzan, esate baterako BTX 2.Bn hiruzpalau botila bete ditugu, hau ez da ezertxo ere ez DBH 1.Ako datuekin alderatuz gero: hauek jadanik 96 botila eta plastikozko bost poltsa bete tapoi bildu dute. Jakin izan dugunez badirudi ikasle batzuk tabernaz taberna ere ibili direla tapa preziatu hauen bila.
Honela segituz gero, tapoietan itota bukatu dugu. Baino bromak alde batera utzita, esan beharra dago honelako ekintzak positibotzat baloratu behar ditugula, solidaritza bultzatzen baitute, guri ez zaigu ezer ez kostatzen plastikozko tapa bat gordetzea eta behar duen pertsona batentzat oso garrantzitsua izan daiteke, beraz ez utzi tapak biltzeari.

Ander Edo

Gazte topagunea 2008

2008-04-21T08:53:00.000-07:00

Martxoaren 21etik 24 bitartera antolatu zen Lezon. Kontzertu hauez gain beste hainbat ekitaldi bazeuden (horien artean Sinn Fein-ekoen elkarrizketa, Bolognari buruzko azalpenak, AHT-ri buruzkoak…). Hala ere, helburua euskal gazteria biltzea zen eta antolatzaileek esan dutenaren arabera arrakasta handia izan da, nahiz eta eguraldiak ez duen batere lagundu. Izan ere, euria, haizea, kazkabarra, denetik izan da eta kanpalekuan lo egiteko asmoa zutenek eragozpen ikaragarriak izan zituzten. Lokatzak eta haizeak traba handia egin zuten. Hori izan da aurtengo Topagunearen “akats” bakarra. Bestela giroa ikaragarria izan da, kontzertuak hasi baino lehenago bi karpak lepo betetzen ziren eta giroa aparta zen.

Beno, orain udaberriarekin ez dira inon herriko festak faltako eta badago beste zereginik. Hala ere, hurrengo urterako lau gau horiek denontzat gomendagarriak dira. Itzela izan da…

IZANDAKO KONTZERTUAK:

OSTIRALA 21:

Latzen

Etsaiak

Gu ta gutarrak

Amaiur

Edan

Xikinkei

Dj bull

LARUNBATA 22:

Ken7

Koma

Anestesia

Des-kontrol

GoseSorkun & Vice Presidentes

Dj Lpunto

Etam

IGANDEA 23:

Hesian

Canteca de macao

Banda basoti

Esne beltza

Katamalo

Tximeleta

Desoreka

Erdizka lauetan

IGANDEA 24:

Petti

Zpeiz mukaki

Etxahun Aurkenerena

Gaur egungo "musika"

2008-04-21T08:50:00.000-07:00

Gaur egungo gizartean, uste ez dugun gauzetan ere esklabuak gara. Honen adibide garbia musika da. Eta honi buruz hitz egingo dizuet nire artikuluan. Lerro hauek idazterakoan nire helburua ez da inor mintzea, zuen begiak apur bat irekitzea baizik.

Egunero komunikabideek komeni zaienarekin bonbardatzen gaituzte eta irratietan egunero kate desberdinetan abesti berdinak errepikatzen dira behin eta berriro. Hau ez da oraintxe asmatu berri dudan kontua, bestela honetaz ohartzeko irratia pare bat egunetan piztu besterik ez duzu egin behar. Gainera errepikapenak ez da okerrena. Jartzen dituzten abestiak gehien ordaindu dutenenak dira eta hau gutxi balitz, besteen txotxongilo besterik ez diren batzuen abestiak dira.

Komunikabideek ez digute errealitatean munduan dagoen musika maila aditzera ematen. Milaka talde daude, famatuekin alderatuz askoz hobeak direnak eta bizitzan aurrera ateratzeko beste zerbaitetan lan egin behar dutenak.

Agian bat edo beste haserretu egingo da adibide hau jartzeagatik, baina orain pil pilean dagoen gaia da. Hemendik gutxira “Eurovision” delakoa egingo dute eta dagoeneko abian da. Suposatzen da bertara estatu bakoitzeko abeslaririk onenak joango direla, baina denok dakigu nor dijoan aurten Espainiaren partez, “Rodolfo Chikilikuatre” delakoa. Umorea egiten duela ez du inork ukatuko, baina goi mailako musikaria al da?
Adibide hau ezin hobea dela uste dut gaur egungo musika arrakastatsua deskribatzeko, baina nik hitz batean definituko nuke, NEGOZIOA. Honengatik gonbite bat luzatu nahiko nizueke irakurtzen ari zareten guztiei, bultza itzazue musika talde berriak, garbiak edota xumeak, hauek baitira musika bihotzez egiten dutenak.

Oier Izulain

Garena gara

2008-04-21T08:42:00.000-07:00

Orain dela gutxi, nire lagun batek txoko batean eserita, triste, negarrez, besteak bezalakoa ezin nintzelako izan sufritzen eta ezertarako balio ez nuela pentsatzen aurkitu ninduen. Nire ondoan eseri eta ondorengo ipuintxoa kontatu zidan.

“Errege bat bere lorategira joan zen eta bere zuhaitzak, zuhaixkak eta loreak hiltzen ari zirela konturatu zen.
Haritzak, Pinua bezalakoa ezin zuelako izan, hiltzen ari zela esan zion.
Orduan, Pinuarengana joan eta triste aurkitu zuen: mahatsondoak mahatsak zituelako eta berak ez.
Mahatsondoa hiltzen ari zen Larrosa bezala loratu ezin zelako.
Larrosak negar egiten zuen Haritza bezain sendoa eta gogorra ezin zelako izan.
Orduan, landare bat aurkitu zuen, inoiz baino freskoago loratzen ari zen krabelin bat. Hori ikustean, erregea berarengana hurbildu eta galdetu zion: Nola da hain osasuntsu hazten ari zarela lorategi zimel eta itzaltsu honen erdian?
Loreak erantzun zuen: landatu ninduzunean krabelinak nahi zenituela suposatu nuelako izan liteke. Haritz bat nahi izanez gero landatu zenezakeen, baina hori egin ordez ni landatu ninduzun. Momentu horretan krabelina izaten ahal dudan hoberen saiatuko nintzela erabaki nuen, eta hona hemen zure lorategiko krabelinik ederrena.”

Bukatu bezain pronto zutitu eta joan egin zen. Ni, berriz, pentsakor gelditu nintzen han eserita, mugitu ezinik. Ez nituen inoiz gauzak horrela pentsatu, baina lagun horrek ipuin honekin esan zidan guztia egia da. Askotan gertatzen zaigu guri hori... zimeldu egiten gara geure kezketan, besteekin konparatzen garenean...
“Izango banintz…”, “Edukiko banu…”, “Nire bizitza izango balitz...”
Orainaldi zehatz batean bizi ordez, beti etorkizun ezezagun bat konjugatuz ibiltzen gara. Badirudi ez dugula ikusi nahi, zoriona guk hautatu dezakegun aukera dela.
Gaur erabaki dezakegu, garenarekin eta daukagunarekin zoriontsu izatea edo ez dugunagatik eta izan ezin dugunarekin nahigabetsu bizitzea.
Gogoratu ezazue bakarrik garena garela, eta inork ezin duela egin gu egitera etorri garena onartzen dugun egunean loratu ahal izango garela.

Sonia Fraile

Gizona haurdun

2008-04-21T08:36:00.000-07:00

Lehenengo eta behin, irudian ikusten dezuena egiazkoa da, ez da ez da potochop-ekin egindako muntaia. Thomas Beatie transexuala haurdun gelditu da saiakera ugariren ostean.

Beatiek bere bularra kentzeko ebakuntza egin zuen eta baita testosterona tratamendua ere, baina bere ugaltze-aparatua (emakumezkoena, jakina!) mantendu egin zuen eta zortzi urte pasa dira bere azken hilekoa izan zuenetik. Hau da, legalki Thomas gizona da, baino emakumezko ugal-aparatu batekin.

Dagoeneko 5 hilabeteko haurdunaldia du, eta dena ondo badoa, neskato bat izango du hemendik lau hilabetera. Thomasen bikoteak (Nancy) umeak izan nahi zituen, ezin zuen ordea, duela urte batzuk izandako gaixotasun batengatik.

Thomasek eta Nancyk ez dute bidea erraza izan, milaka dolar gastatu dituzte bere saiakeran,tartean umeki bat galdu ere bai. Lehenengo momentutik aurka izan zituzten medikuak eta familia. Thomasen anaiak, umekia galdu zutela ohartu zenean, honakoa esan zuen “Hona da hori gertatzea, batek daki zer nolako monstruoa izango litzatekeen”.
Dudarik gabe berria oso bitxia da, nire ustez zientziaren aurrerapenek ekarri dezaketenaren erakusgarri. Honelakoetara ohitu beharko gara hemendik aurrera. Honelako kasuak tentuz ukitu behar dira eta beti errespetu osoz.

Ander Edo

...eta tenisa zer?

2008-04-21T08:31:00.000-07:00

Gaur kirolari buruzko artikulu bat ekartzen dizuet, baina hemen ez dut hitz egingo ez Errealari buruz, ez Badiolari buruz; tenisaren inguruan hitz egingo dizuet: jokalariak, txapelketak… (kirol gehienei kritika eginez, noski!).

Tenisa nahiko baztertuta dugun kirola da, eta hori behin eta berriro ikusten dut bai telebistan zein irratian kirol albisteak botatzen dituztenean; ASKI DA!!. Kirol albisteak jarri eta entzuten duzun lehenengo gauza: “Ronaldinho potolo dago!” edo “Fernando Alonsoren kotxea gasolinarik gabe geratu da!”. Hauetako gauzekin hasten dira beti, nahiz eta Rafael Nadalek Roland Garros txapelketa irabazi hirugarren aldiz (nire ustez hau Ronaldinhoren “kupela” baino garrantzitsuagoa da).

Zer gertatzen da ba tenisarekin? Aspergarriagoa al da? Ba ez! Gaur egun Espainiak oso tenis jokalari onak ditu: Rafael Nadal, David Ferrer, Tommy Robredo... eta kirol honek txapelketa asko eta garrantzitsuak ditu, Wimbledon edo Australiako irekia esaterako. Gainera tenisean dagoen lehia handiagoa da, zeren irabazi edo galdu egiten baita jokalarien arabera eta ez diruaren arabera, futbolean edo Formula 1ean gertatzen den bezala (zer gauza arraroa, diru gehien daukanak beti irabazten du!). Gainera kasu askotan kirol hauetako gehienetan “txutxumutxuak” eta “marujeoa” ematen dira eta ahaztu egiten da benetan garrantzitsua dena: jokoa.

Besterik gabe, tenis gehiago ikustera animatzen zaituztet (gustatzen bazaizue behinik behin!) eta barkamena eskatzen dut futbolaren eta Formula 1en zale amorratuei.

Iker Estevez

Hasi da berriro

2008-04-21T08:19:00.000-07:00

Berriro dugu gurekin 1 Formula eta urte honetan benetan ematen du Alonsok ez duela txapelketa irabaziko. Azken urteotan, lehenengo lasterketen ostean Alonso genuen txapelketako jaun eta jabe, baina dirudienez bere aurtengo autoak ezin du gehiago eman. Oraingoz goian dauden pilotuak Hamilton eta Raikkonen dira, bakoitza lehenengo postuan gelditu da behin gutxienez.

Lehengo bi lasterketetan ikusi ahal izan denez Ferrari eta McLaren Mercedes taldeak besteak baino lasterragoak dira. Hirugarren talde bezala BMW-Sauber dugu eta honen ondoren nahiko nahasirik daude. Williams-ek, Renault-ek eta Toyota-k laugarren postua nahi dute eta hemen egongo da benetako borroka. Nork irabaziko duen seguruenik azkeneko lasterketaraino ez dugu jakingo, baina polita izango da hiru talde hauen arteko ika-mikak ikustea.

Aurten ere beste gauza batzuk aldatu dira 1 Formulan: Indiar talde batek Spyker erosi eta Force India deitu du, Piquet dugu Alonsoren kide, Hamilton eta Kovalainen dauden McLaren Mercedes-en, Ross Brawn-ek Honda taldearen gidaritza hartu du, etab. Hala ere, aldaketarik garrantzitsuena Bourdais-en etorrera izan da. Pilotu honek lau urtez irabazi du Champ Car-a, Estatu Batuetako txapelketarik garrantzitsuena eserleku bakarreko ibilgailuei deritzonez, eta berdina egin nahi du 1 Formulan. Hala ere, nahiko zaila izango du Toro Rosso taldean baitago eta badakigunez auto hauek beti atzealdean ibiltzen dira. Horregatik miresgarria da lehenengo lasterketan bi puntu lortu ahal izan zituela.

Beste aldaketa garrantzitsu bat hiri lasterketen beretorrera da. Orain dela urte batzuk kendu egin ziren segurtasuna zela-eta. Monaco-z gain Balentziakoa eta Singapur-ekoa izango ditugu gurekin. Azken hau 1 Formulako lehen gau lasterketa izango da.

Bien bitartean Schumacher, 1 Formulako txapeldun ohia, Skoox Cup moto txapelketan parte hartzen ari da. Bere bigarren lasterketa irabazi zuen eta nork daki, agian denbora baten barruan goi mailako lasterketak irabazten egon liteke.

NORK IRABAZIKO DU AURTEN 1 FORMULA TXAPELKETA??????

Iker Pedrosa

Pekingo jokoak

2008-04-21T08:15:00.000-07:00

2008ko abuztuaren 8an, arratsaldeko 20:00etan, Pekingo Joko Olinpikoak hasiko dira. Bertan, dakizuen bezala, herrialde askotako kirolariek parte hartuko dute eta selekzio ugari izango dira (Euskal Herria tamalez ez da selekzio horien artean izango, ez baita oraindik ofiziala).

Joko Olinpikoak antolatzen dituen hiriak badaki bi astez munduaren erdigune izango dela, eta Pekinek, mundu osoa berari begira egongo dela jakinik, erakargarriago azaldu nahi du. Horregatik, herritarrentzako portaera ikastaroak, izpiritu olinpikoaren zabaltzea, etab. sustatu ditu; eta horren berri eman du nazioartean.

Esan ez duena zera da: giza eskubideak sistematikoki bortxatzen jarraitzen duela eta munduko herrialde kutsatzaileena (Ameriketako Estatu Batuen ondoren, noski) eta kutsatuenetarikoa dela.

Giza eskubideen bortxaketari dagokionez, diktadura bat denez, ez gintuzke gehiegi harritu beharko; baina datuak edonor ikaratzekoak dira: urtero 8.000 fusilatu (Amnistia Internazionalaren arabera), kartzelak fusilatuko dituzten preso politikoz beteak, heriotza-zigorra kendu beharrean “bigundu” egin du bertako legebiltzarrak, fusilatzea erabili beharrean injekzio hilgarria erabiltzera bultzatuz, Tibeten aurkako zapalkuntza neurriak, etab.

Kutsadura mailari dagokionez, Pekingo airea munduko kutsatuenetarikoa da eta horrek kirolarien osasunean eragin kaltegarriak izan litzake. Hori dela eta, herrialde batzuk euren ordezkaritzak Txinatik kanpo jarriko dituzte, ez baitira bertako airearen mailaz fidatzen.

Demagun hau guztia, Pekinen izan beharrean Kuban gertatzen dela (bi herrialdeak diktadura komunista baten menpean baitaude). Zer esango lukete amerikarrek edo europarrek? Zalantzarik gabe, giza eskubideen bortxaketa salatu eta oposizioko kideekin bilduko lirateke. Zergatik ez dute gauza bera egiten Txinan? Arrazoi ekonomikoengatik. Txina mundu mailako potentzia ekonomikoa bilakatzeko bidean dagoelako eta hobe delako txinatarrekin gehiegi ez haserretzea.
Moral bikoitz honek agerian jartzen du nazioartearen lotsarik eza. Herrialdea pobrea bada, giza eskubideak betetzera derrigortzen dute ; aberatsa bada aldiz, ezikusiarena egiten dute, ezer gertatuko ez balitz bezala. Giza eskubideak ordea, herrialde txiro eta aberatsetan bete beharrekoak dira, ez baitira ekonomi mailaren araberakoak.

Aitor Ulanga

Oporrak, zertarako?

2008-04-21T08:13:00.000-07:00

Askotan gurasoei hurrengo hau entzuten diegu: Zer ongi orain oporrak, ezta? Baina, zer dira oporrak hain zuzen ere? Oporrak deskantsatzeko garaia da. Hau da, ezer ez egiteko garaia. Zeozer egitekotan, norberak bere hobby-ak egin behar ditu: kirola egin, “neskatan egin ” eta abar. Baina zoritxarrez batzuen oporrak ez dira horrelakoak: lan egin, estudiatu edota berreskurapenak prestatu behar dituzte. Gaizki doan ikasleak hau egitea ulertzen dut, baina beste ikasleek hau egitea ez dut ulertzen. Pixka bat pentsatu behar dugu. Ondo lan egiten duenak sari on bat merezi du, ala? Bestela erre egingo delako. Oporrak zertarako ? ... gozatzeko.

Julen Ulanga

Debekatuta hiltzea

2008-04-21T08:09:00.000-07:00

Honela erabaki du Sarpourenx-go (Frantzia) alkateak. Bando baten bitartez jakinarazi du debekatuta dagoela herrian hiltzea.

Dirudienez herriko kanposantua txikia geratu zaie eta epaile batek ez die utzi ondoko lursail bat desjabetzen hilerria haunditzeko. Bando honen bitartez Sarpourenx-go alkateak epailearen erabakiaren aurrean bere desadostasuna aurkeztu nahi du. Alkateak dio herrian hilobiratzeko lekurik gabe hiltzen denari zigor gogorra ezarriko zaiola. “Jende askok bromatzat hartzen du, baino guk ez” dio Lalanne alkateak.

Ander Edo

2008-04-21T07:47:00.000-07:00

*OHARRA: Irudia kalitate hobeagoan ikusteko egizu "klik" bere gainean

2008-04-21T07:11:00.001-07:00

2008-04-21T07:11:00.000-07:00

Gabonak...

2008-04-21T07:05:00.000-07:00

Urtarrilaren 6an ohetik altxa eta saloira iristean… ‘Oh! Zein polita! Opariak, opariak, opariak…’ Geroago kutxazain batean sartzen zara dirua ateratzeko asmoarekin eta ‘ha sobrepasado el límite’ agertzen da pantailan letra horiekin. ‘Kaka zaharra!’ Frantziako Iraultza txiste bat izan zen momentu horretan monarkiari buruz daukazun ideiarekin alderatuz.

Hurregon egunean esnatzen zara berriro (zer erremedio…) eta saloira abiatzen zara aurreko egunean bezala. Baina oparirik ez. Orduan oroitzen zara: ‘Amaaaaa! Gosaria, berandu noalaaaaa!’ Eskolara iritsi eta lo aurpegiak besterik ez dituzu ikusten. Aharrausi bat, ‘Zer moduz oporrak?’, beste aharrausi bat, ‘Eta erregeak? Ondo?’, aharrausi…

Arratsaldean aire pixka bat hartzea erabakitzen duzu eta motxila hartuta Donostiako erdialderantz zoaz autobusean. Eskaparate guztietan BEHERAPENAK eta zu dirurik gabe. Momentu horretan ziztada bat sentitzen duzu tripa aldean.

Bai, hori dira gabonak: pobrezia, logurea eta bihotzerrea.

Marta Garcia

Gazteen iraultza

2008-04-21T06:57:00.000-07:00

Fubolan iraultza bat bizitzen ari gara. Argi dago. Munduko futbolaririk onenak gazteak dira eta hori ez da askotan ikusi izan futbolaren historian. Normalean 26 eta 30 urte artean izan dira onenak, baina gaur egun izar berri asko dago. 20 eta 25 urte artekoak denak eta kasu askotan haiek baino zaharragoak direnak baino hobeak dira.

Cesc Fabregas kataluniarra, munduko jokalari onenetarikoen artean dago denboraldi honetan erakusten ari denez, onena ez bada. Arsenal bezalako talde gazte baten liderra da soilik 20 urterekin eta bere taldea lehen postuan mantentzen ari da Manchester eta Chelsea bezalako taldeen aurrean. Kasu hontan Wenger erakusten ari zaigu, batzuetan hobe izaten dela gazteak ondo hezitzea, espero baino gutxiago egiten duten jokalarietan dirutza gastatzea baino. Cesc-ek magia darama bere zangoetan, bere paseak zirraragarriak izaten dira eta edonork nahiko luke bere taldean, baina espero dugu Arsenalen luzaroan gelditzea.

Kaká brasildarra askorentzat munduko onena da 25 urterekin bakarrik. Milanera etorri zenean, jende gehienak txisteak besterik ez zituen egiten bere izenarekin, baina bere kalitateak denak isilarazi zituen. Bai defentsan eta bai erasoan ematen duen laguntzak Zinedine Zidane onena gogorarazten digu. Teknikoki onenetarikoa, beti sasoi onean (bere selekzioko kide batzuk ikasi beharko luketena), beti taldearentzat jokatzen, astebururo erakustaldiren bat ematen duena. Iazko Champions League-a izan zen bere kalitatearen erakustaldi nagusia, batez ere, finalerdietan Manchesterren kontra. Brasildarrak berarekin konparatzen duten portugaldar bat baino askoz hobea dela erakutsi zigun.

Messi argentinarra sekulako "booma" izan zen espainar ligan. Debutatu zuenetik aho bete hortz uzten gaitu baloia ikutzen duen bakoitzean. 21 urterekin soilik Nou Camp-a zutik uzteko gai da nahi duenean. Leok duen arazo bakarra bere lesioak dira, baina espero dugu honegatik ez izorratzea munduko jokalari onenetariko baten etorkizuna. Maradonarekin konparatu izan digute Leo Messi. Ez dakit zenbateraino izango den, baina futbolak gaur egun duen jokalaririk explosiboena da.

Futbol profesionalean azkenak sartu direnak mahai gainean kolpe gogor bat jo dute eta zertarako diren gai erakutsi digute. Orain iraultza dator

Martin

Giza ekubideak

2008-04-21T06:52:00.000-07:00

Abenduaren 10ean igaro berri dugun Giza Eskubideen Eguna aprobetxatuz, giza eskubideen inguruko gogoeta bat burutu nahi nuke.

Giza Eskubideak pertsona orori atxikitutako eskubideak dira pertsona horren jaioterria, arraza, sexua, etab. edozein delarik; hitz gutxitan, pertsona izateagatik guztiok ditugun eskubideak. Baina, eskubide horiek benetan betetzen al dira? Askotan, giza eskubideak bortxatzen direla entzutean segituan jo ohi dugu hirugarren mundura edota Irak, Afganistan, Palestina bezalako herrialdeetara; baina ez genuke hain urrutira joan behar; gure herrian bertan ere, herri garatu bat garen arren, giza eskubideak bortxatu egiten baitira. ETA bera da eredu argi bat. Hilketa eta mehatxua erabiliz ahalegintzen da bere proiektu politikoa inposatzen, ohartu gabe indarkeriak sekula ez diola inolako etekin edo irabazirik ematen berau erabiltzen duenari, soilik sufrimendua eta samina ekar diezazkiokeela indarkeria darabilenari eta indarkeria hori pairatzen dutenei. Bestetik Alderdi Legea edota presoen sakabanatzea daude, hauek ere erreminta legala diren babespean, baina parte hartze politiko askearen aurkako neurria bata ( Alderdi Legea, ez baitio ezker abertzalearekin bat datorren jendeari erakunde esparrurik uzten) eta mendekuan oinarritutako politika judiziala bestea ( preso batek Zuzenbidearekin bat etorriz bere etxetik hurbileneko kartzelan bete behar baitu bere espetxe zigorra). Gaixoa sendatzeko botika desegokiak nire ustean.

Bestetik giza eskubideei buruz ari garenean ezin ahaz ditzakegu beste eskubide batzuk; gizarte eskubideak deritzenak. Hemen sartuko genituzke esaterako, denok etxebizitza duin bat izateko dugun eskubidea ( nire ideologiagatik oso gustuko ez dudan Espainiar Konstituzioan 47. artikuluan aipatzen dena, baina betetzen ez dena) edota ingurumen on bat izateko dugun eskubidea (aldaketa klimatikoarekin kinka larrian dagoena); baita ere gutxiengoen hizkuntz eskubideak ( Iparraldean eta Nafarroa erdi-hegoaldean euskaldunek bortxatuak dituztenak). Beraz argi dago Euskal Herrian ere, nazio garatu bat garen arren, bide luzea dugula jorratzeke giza eskubide guztiak pertsona guztientzako bermatuak egon daitezen. Eta hau ez da Olentzerok ekar diezagukeen gauza bat, denon artean lortu behar dugun zerbait baizik. Urteberri on guztioi!!

Aitor Ulanga

Gabonen zentzua

2008-04-21T06:47:00.000-07:00

Gabonak iristear daude eta dagoeneko hasi da komunikabideen bonbardaketa eta haurrak bortizki iruzurtuak dira Olentzerori mila gauza eska diezazkioten urtero bezala. Janariaren prezioa gora doa eta famili guztiek euren poltsikoak hustuko dituzte ustez gabon zoriontsuagoak izan ditzagun.

Ikusgarria da nola erabiltzen gaituzten haiek nahi duten gizartea sortzeko. Neskatxek pixa, kaka eta botaka egiten dituzten panpinak (liluratuta gelditu nintzen hau ikusi nuenean) erosi behar omen dituzte, mutikoek berriz, mila gauza egiten dituzten autoak.
Ikusten duzuen bezala txikitatik irudi batzuk ezartzen dizkigute. Eta gezurra badirudi ere, gizartearen arazo asko, honekin zeharo sendotzen dira. Emakumeen eta gizonen desberdintasunetik hasita, autoestima falta bezalako arazoetaraino. Zeren eta, ze itxura dute “Barbie” bezalako panpinek? Edo zergatik mutikoek autoekin jolastu behar dute eta neskatxek etxeko lan guztiak egitera?

Honengatik guztiagatik, batzuetan galdera bat egiten diot neure buruari: Ez ote gara telebistaren, komunikabideen eta beste askoren esklabu? Nik uste dut galdera interesgarria dela. Baina ez da hau neure artikuluarekin aditzera eman nahi nizuena.

Nire artikuluarekin gabonen benetako zentzuaren inguruan gogoeta egin dezazuen nahi nuen. Gabonetan benetan ospatzen dena Jesukristoren jaiotza da eta hau guztiok badakigu, bai sinesdunek eta bai sinesgabeek. Ez dizuet orain Jesusen bizitza kontatuko, baina denok dakigu kapitalismoaren kontrako eta txiroak laguntzen zituen gizona izan zela. Horregatik, ikaragarria iruditzen zait nola bere jaiotza gizarte kontsumistarekin ospatzen dugun.

Ondorioz, gonbidapen bat luzatu nahi dizuet. Gabonak edo Jesusen jaiotza ospatzen badituzue, ez izan hipokritak. Gizon honen ideiekin ospatu ezazue, batasun eta maitasunarekin.

Oier Izulain

Titin III.a txapeldun

2008-04-21T06:41:00.000-07:00

2007ko abenduaren 2a. Arratsaldeko 19:15. Titin III.ak 22, Barriolak 15. Gasteizko Ogeta pilotalekuan Titin III.aTxapeldun Buruz buruko Lau terdiko txapelketa irabazi eta gero.
Azkenean pilotak justizia egin du Titini buru gainean txapela jarriz. Hogeita hemezortzi urte eta gero, buruz buruko txapel bat lortu du triziotarrak. Justizia egin da hurrengo arrazoiengatik :

1. Errioxarrak 1.300 partida jokatu dituelako bere estraineko egunetik.
2. Titinek jende asko eramaten duelako frontoira eta baita ere entretenitu; horietako bat, ni neu.
3. Retegi II.aren aurkako 1997ko finala pilotazaleok beti gogoan mantenduko dugulako hamar urte igaro arren. Partida honetan denetarik egon zen eta triziotarra 17-21 aurretik jarri bazen ere, galdu egin zuen 22-21. Beste final bat ere jokatua du Titinek Nagoreren aurka; egun horretan, irurtzundarrak egurra eman zion eta merezita 22-15 irabazi.
4. Titin edozein egunetan partida bat jokatzeko prest dagoelako.
5. Augusto asko entrenatzen delako eta asko sakrifikatzen delako.
6. Udako txapelketa asko jokatu eta irabazi duelako errioxarrak.
7. Binakako hiru txapela dituelako: bat Lasa III.arekin, bestea Goñi III.arekin eta hirugarrena Arretxerekin.

Honekin ez dut esaten Abel Barriolak ez duenik esfortzurik egin txapela irabazteko. Abel Barriolak hamar final jokatuak ditu mano mano, horietatik hiru irabaziak eta zazpi galduak. Abelek badu kaiolan txapel bat irabazia ofizialki, Eugiri irabazi ziona 22 – 10. Beste txapela, Nafarroako lau terdiko txapelketan irabazi zion Patxi Eugiri 22-13 urte berean. Zorionak Augusto !!!

Julen Ulanga

Etapa berria

2008-04-21T06:37:00.000-07:00

Lehengo urtarrilaren 3an Errealean hauteskundeak izan ziren. Asko hitz egin da hauteskunde hauei buruz, txinatarren kontua zela-eta. Azkenean jende askoren buruan zegoena bete egin da eta Badiola jauna Errealaren lehendakari bilakatu da akziodunen %71ren babesarekin.

Egia esan behar bada, Badiolak gauza berriak ekarriko dizkigu, beste administrazio kontseiluek eman ez digutena. Nik uste dut kontseilu honek konfidantza emango digula gure taldearengan. Bakarrik ikusi behar da zenbat lan egin duten hauteskunde hauek irabazteko: hauteskundeetarako artean zenbait hilabete gelditzen zirenean, ia ia Donostiar guztiek bazekiten zenbat jokalarirekin hitz egin zuten, denen ahotan txinatarrak zeuden, ez zen ezer entzuten kontseilu zaharrari buruz, beraz esan daiteke garaipena merezita izan dela.

Batzar orokorrean ikus zitekeen nola kontseilu zaharrak bere kanpainia nolabaitean beste hautagaiak gutxiestea izan zela, besteen puntu ahulak, nolabait esateko, astintzea beraien planak argi eta garbi azaldu ordez.
Orain bakarrik geratzen zaiguna taldea eta taldearen administrazioa nola doan ikustea da, jokalariek dena eman beharko dute taldea aurrera joan ahal izateko, argi baitago haiek ez baldin badute ezer egiten berdin duela zein dagoen administrazio kontseiluan. Beraz lehengo hilabete hauetan pazientzia eskatu behar da.

Besterik gabe AUPA ERREALA!!!

Aitor Jaime

Printzesa gau batez

2008-04-21T06:31:00.000-07:00

Ez dut inoiz ahaztuko gau hura. Han geunden gu, artean elkar ezagutu gabe. Dotore-dotore zeunden zure alkondara beltz berriarekin, gonbidatu guztiak agurtzen zure irribarrearekin, inoiz ikusi dudan irribarre ederrenarekin. Denok maite zintuzten, eta ez da harritzekoa, joaten zinen leku guztietara zure pozarekin kutsatzen gintuzun gu denak. Gaua luzea izan zen, baina niri izar herratua izan balitz bezala pasa zitzaidan.

Afaria bukatu orduko festa hasita zegoen. Oraindik gogoratzen dut nola ezagutu ginen. Neska guztien ahotan zeunden, dantzari aparta baitzinen. Dantzalekura joatera ez nintzen ausartu, denen aurrean erridikulua egiteari beldur handia bainion. Horregatik, txoko batean eseri nintzen zu ondo ikusteko. Bizpahiru abesti pasa ondoren eserlekutik altxatu eta kanpora joan nintzen. Aire pixka bat behar nuen, ez nekien zer gertatzen zitzaidan. Nire burutik joan behar zinen, eta laster, bestela zoratu egingo nintzen. Ordu erdi igaro ondoren barrura joan nintzen festara itzultzeko asmoz, baina orduan, estropozu egin nuen norbaitekin eta ia-ia lurrera erori nintzen. Ezin nuen sinetsi, zu zinen. Pixka bat hitz egin eta gero dantzatzera gonbidatu ninduzun. Tipo ona zinen, eta nire printze urdina zinela esatera ausartuko nintzateke. Horregatik, nahiz eta lotsa eta beldur izugarria izan, ezin izan nion zure gonbidapenari ezetz esan. Oso erne nengoen egiten zenituen pausoak kopiatzen hanka ez sartzeko, esaldi hori esan zenidanean: “Besteez ahaztu, imaginatu bakarrik gaudela eta musikaren erritmoa jarraitzen saiatu”. Horrela egin nuen, eta konturatu nintzen nola pixkanaka-pixkanaka askatasun sentsazioa handitzen zen. Ezin dut esplikatu momentu horretan sentitu nuen guztia. Ametsa zirudien. Oso ondo portatu zinen nirekin gau osoan, printzesa bat izango banintz bezala tratatu ninduzun. Ondo baino hobeto pasa genuen, eta festa bukatzeko, eman zenidan muxu eder hura, nire lehenengo muxua. Denek kontatzen dutena baino zoragarriagoa da. Gau polita izan zen hura, bai horixe, izarrez betetako zerua zegoen, eta haien artean zu zinen gehien distiratzen zuena. Egun horretatik ez zaitut berriz ikusi, baina beti gogoratuko zaitut, nire bizitzan oso garrantzitsua izan baitzara.

Orain, festa batera joaten naizen bakoitzean, pentsatu ere ez dut egiten txoko batean esertzea dantzatu gabe, eta ahal dudan guztietan dantzan jarraitzen dut. Liburu bat ere idatzi dezaket dantzari buruz, baina ez luke ezertarako balio. Dantzatzea beharrezkoa da sentitzen dena sentitu ahal izateko. Norbaitek esan zuen bezala: “dantzari klasikoak oinen puntaren gainean mugitzen dira, denbora berean lurra ikutzen eta zerua heltzen ari direlako”.

Horregatik, ez utzi inoiz dantzatzeari, eta garrantzitsuena dena, ez utzi inoiz zure irribarrearekin zure inguruan dauden guztiak kutsatzeari, ez dakizu noiz maitemindu daitekeen norbait zure irribarreaz.

Sonia Fraile

Kanon digitala

2008-04-21T06:25:00.000-07:00

Legala? Ez baino denok egin dugu noizbait. Denok kopiatu degu noizbait diskoren bat. Hau dela eta, 1992tik aurrera kopiatzeko gai ziren plataforma guztiak zergapetu eginziren (garai horietan vhs-ak eta kaseteak, eta denbora aurrera joan ahala cd-ak, dvd-ak, etab). Honela kopiatzeak ekartzen dituen galera ekonomikoak leundu nahi ziren.

Gaur egun arte cd-ak eta dvd-ak ziren zerga hau pairatzen zutenak nagusiki, baino teknologia aurrera doa eta horregatik gobernuak mp3-ak garraiatzeko eta entzuteko aukera ematen duten produktuak zergapetu ditu (besteak beste mp3, mp4, pen drive eta mobilak). Suposatzen denez edonor errugabea da kontrakoa frogatu arte, lege honek paradoxa ederra aurkezten digu, orain denok gera errudunak kontrakoa frogatu ala ez. Hau da, produktu bat erosten duzun momentutik nolabaiteko isun berezi bat ordaintzen ari zera, cd, dvd edo dena delako horrekin egin dezakezunagatik. Arau hau muturrera eramanda, guraize batzuk erostean gartzela zigorra jasan beharko genuke guraize hoiekin edonor hil baitezakegu. Gazteok dauzkagun kontsumo ohiturak direla eta lege honek zuzenean gure poltsikoan eragina dauka. Ondoren gaur egun dauden tarifak aurkeztuko ditut eta gobernuak proposatzen dituenak. Lege hau urtarril erdialdean jarriko litzateke martxan. Eta ez ahaztu

“denok gera errudunak, kontrakoa frogatu ala ez frogatu”

Ander Edo

Ongi etorri

2007-12-07T12:41:00.001-08:00

Ongi etorri liztor aldizkariaren blog-era. Hemen aurkituko dituzue gure artikulu guztiak, horretarako "zenbaki guziak"-en zenbaki bat aukeratu eta zenbaki horren artikulu guztiak agertuko zaizkizue pantailan. Gogoratu artikuluak komentatu ditzakezula. Besterik gabe espero dugu blog hau zure gustokoa izatea.

Euskal kanturik onena

2007-12-07T12:18:00.000-08:00

Liztor aldizkarian XXI mendeko euskal kanturik onena bilatzen ari gera. Horretarako beharrezkoa degu zuen laguntza. Bidali zuen proposamena gure e-postara edo egin blogean bertan "0 comentarios" en klikatzen. Parte hartzen duten guztien artean sari bat zozkatuko dugu.

Liztor aldizkaria 4 Zenbakia

2007-11-23T04:23:00.000-08:00

Norabide ezean…

2007-11-23T04:12:00.000-08:00

Berrogei urte Lehengo mailan egon ondoren berriz ere infernura bueltan gaude. Bi liga irabazi, "Champions"-ean duintasun osoko papera jokatu ostean, bigarren mailako taldeekin ari gara jokatzen orain. Merezi al dugu? Ba egia esan ez dakit, lehengo mailan geratzeko adina taldea bageneukan, baina jokalari, entrenatzaile eta zuzendaritzaren lan ezak eraman gaitu honaino. Bestetik, hain zaletu onak al gara? Gure bilbotar bizilagunek, Mames deuna betetzen zuten gaizki pasatzen zutenean, guri berriz, bigarren mailan kostatu egiten zaigu, zelai erdia betetzea. Gainera, Anoetak, San Mamesek baino 20.000 eserleku gutxiago dituela ikusiko bagenu...

Nire ustean aurtengo denboraldia ezin zitekeen okerrago antolatu. Batetik, hasteko esperientzia eta gogortasuna eman ziezaguketen bi jokalariei atea non zegoen erakutsi genien, Darko Kovacevic (lehengo mailan gol mordoa sartutakoa) eta Aitor López Rekarte (10 denboraldi baino gehiago lehen taldean eta hainbat urtetan kapitaina izandakoa...). Gainera badago jendea honetaz pozten dena... Bestetik, Chris Coleman izeneko gizasemea daukagu taldea zuzentzen, 38 urteko galestarra, Fulham taldeko entrenatzaile eta jokalari izandakoa. Zertan ari gara jokatzen? Futbolean ez behintzat. Azkenik Delibasic eta Vaughan izeneko gizonak fitxatu ditugu zeozer egitearren aurten. Delibasic aurrelari petoa omen da, azken hiru urtean 5 gol sartu dituena, hau da, gure Ronaldo berria. Bestea, Vaughan, ezker hegalean abila omen den gizasemea. Orain arte ingalaterrako hirugarren mailan ibilitakoa, gutxi gora behera Messi ezkerra deituko nioke nik.

"Norabide ezean... azken zokora maldan behera goitibera bidaian... Hala ere BETI ERREALAREKIN!!!!!

Martin

LAU BEGI EDER

2007-11-23T03:53:00.000-08:00

Urtero bezala Aste Nagusian Cadena SERek “Donostiako begirik politenak” lehiaketa egin zuen. Urtero bezala partaidetza handia izan zen, 400 pertsonatik gora aurkeztu ziren. Aurten ordea, aldaketa txiki bat egon zen, pertsona guzti hauen artean gure eskolako neska batzuk zeuden. Denbora dexente itxoin behar izan zuten baino azkenean finalisten zenbakiak eman zituzten (urdaiazpiko bat zozketatzen ari zirela zirudien) eta 10 zenbaki horien artean ikastetxeko bi nesken zenbakiak zeuden. Zoritxarrez ez zuten irabazi, baino beren begiek Donostiako 10 begi politenen artean egotea ez da gutxi. Hauxe da gure ikastetxeko nesken edertasunaren
erakusgarria. Batek daki, agian noizbait
La Salle irratiak (105.0 FM) honelako lehiaketa bat prestatuko ote duen.

Oharra: Begi berdea Maialen Corral begi urdina Oihana del Valle

Ander Edo

BIKINI OPERAZIOA

2007-11-23T03:44:00.000-08:00

Denak dakizuen bezala, uda iristen ari den heinean, neska gehienek hasten duten prozesua da. Normalean Aste Santua pasatzerakoan hasten dute. Dietetika eta argaltzeko produktuen saltzaileek garai hau erabiltzen dute marketing gehiago egiteko. Bikini operazioa kaloria gutxiko janariak jateari deritzo. Haien artean salduenak %0-koak dira, hala nola: barrita energetiko light-ak, zereal espezializatuak eta pilula magikoak.

Denak mentalizatuak gaude udarako argal eta ederrak egon behar dugula, arropa berriarekin soberan ditugun “txitxiak” ez nabaritzeko. Dieta zorrotzak egiteaz gain, kirola egiten dute. Bakoitzak nahi duen gorputz-atala hobetzeko. Batzuetan ondorio kaltegarriak ekartzen dituzte. Emakume gazte portzentai gehiegizko bat anorexian edo bulimian erortzen ari dira. Estudio batek dio anorexia eta bulimia arazoak %30ean hazten direla bikini operazioarekin. Era berean, harrigarria den arren, 9 urteko zenbait umeren artean anorexia azaldu dela omen diote. Normala da halako kasuak izatea, daramagun itxura gure gizartean oso inportantea delako.

Telebistan begiratzen badugu, aktoreak operatuta edo gure ustez gorputz ikusgarriekin ikus ditzakegu. Aldizkarietan begiratzen badugu, nahiz eta auto edo etxe apainketakoak izan, neska polit eta argalak ateratzen dira.

Honekin esan nahi duguna zera da: pertsonengan garrantzitsuena ez dela fisikoa, baizik eta bakoitza bera den bezala maitatzen jakitea. Mila aldiz hobeagoa da barrutik aberatsa izatea kanpotik “supermodeloa” izatea baino.

D&C Doltxe & Cabaña

Rodrigez doktorea “DROGAK”

2007-11-23T03:26:00.000-08:00

Esaten digute eskolan drogak txarrak direla, beno ba agian egia da, nik nire iritzia gordetzen dut. Hala eta guztiz ere, ez digute inoiz benetan mingarriak diren drogez hitz egin. Kokaina, heroina, kanabisa, alkohola, etab. Oso mingarriak dira, hala ere, ez dute konparaziorik beste drogekin.

KIROLA:

Kiroladiktuek interneten eta egunkarietan bilatzen dute kirolei buruzko albiste berriren bat, 21:30 joaten dira telebistara zuzenean ea errealak norbait fitxatu duen jakiteko edo motoziklismoan gertatutakoaz jakiteko, agian F-1eko azken albisteak fresko izateko, txirrindularitzako dopinez jakiteko… azken finean kirolen munduan punta-puntako informazioa izateko, bere bizitza kirola da. Kiroladiktua izanez gero, ez zara horregatik hilko, baina agian denbora ugari galduko duzu.

EMPOLLING-A:

Empolling-adiktuek beti dute liburu bat eskutan eta bere bizitzako eginbehar bakarra ukondoak matxakatzea da, egun batean 4 ordu edo gehiago eman dezakete ikasten, nahiz eta ikasitakoak ezer gutxirako balio. Mota honetako jendearen helburu nagusia media bikaina lortzea da eta horretarako EDOZER egingo dute: lagunak (baldin badituzte) zapalduz, irakasleei mingaina ipurtzuloan jarriz, eta nahiz eta sinestezina iruditu, badira baten batzuk sexualki irakasleren bati “faboreren bat” egingo lioketenak nota on bat lortzearren. Empolling-adiktuak ez dira bere adikzioarengatik hilko, bai hala da, baina lagunak galtzen ez badituzte, PARAPAk izaten bukatuko dute.

PLAY STATIONA:

Playadiktuek, egunak eta egunak eman ditzakete etxean inor ikusi gabe, beraien lagun hoberena PS2, PSP edo PS3a baita. Normalean jende hau zoriontsua da bere konsolarekin. Urteko egunik zoragarriena haientzako beren bideo-joko maiteena (ez gogokoena, eh! MAITEENA) ateratzen denean izaten da (normalean nola ez PES Xa). Play Stationadiktuek ez dira horregatik hilko, baina beren jainko bakarra SONY izango da.

MALOSOMANIA:

Malosomaniakoek, oso, oso, oso baina oso “maloak” dira eta horrexegatik beraien gurasoek esandakoaren kontrakoa egingo dute beti. Egunero bota porrue, klasera more-more joanda, larunbatero botaka bukatzen edateagatik, ehun mila piercing edo jarririk gorputzen zehar, tatuajeren bat ere ondo doa, nola ez! Malosomaniakoa izateagatik ez zara hilko, beno agian bai, norberak daki zer egin nahi duen eta nola pasa nahi duen denbora, ezta?

PORNOMANIA:

Pornomaniakoak guztiok dakigu nolakoak diren, beren jabetzarik garrantzitsuenak DVD pornoak dira, agian lagunak bere etxera zohazte “Santa Ageda jotzera”, koro eta guzti, hori mutilak bazarete, neskak izanik ez dut pentsatu ere egin nahi… Errealitatean jende honek nahi duena larrua jotzea da, hori argi eta garbi uzten dute, nahiz eta gero mandril bat bezala jokatu. Pornomaniakoa izateagatik ez zara hilko, nahiz eta agian zure zakil edo aluan gaixotasun arraroren bat jasan agian.

TXONTXONGILOTASUNA:

Txontxongilotasuna gaur egungo gaixotasuna da. Baina beti izan da aktualitate handiko gaia. Pertsonak integraturik bizi nahi dute, baina hau lortzeko beraien nortasuna galtzen dutenean besteen txotxongilo bihurtzeko, akabo! Dena besteek bezala pentsatuko dute eta gaixotasun honek txontxongilo bat bezala jokatzera behartuko zaitu. Txontxongilotasunak ez zaitu akatuko, edo agian bai, behintzat hire arima suntsituko du

Iban Rodriguez

TXIRRINDULARITZAREN EGOERA BELTZA

2007-11-23T03:20:00.000-08:00

Txirrindularitzaren egoera gaur egun oso larria da dopinarengatik. Vinoukorouv, Moreni, Kasheckin, Mayo, Landis, Basso, Ullrich, Heras gehi “Operación Puerto”-koak. Kontuan hartu behar da Rassmussen Tourrean 1. zihoala, bere taldeak bota egin zuela. Pentsa zer edukiko zuen bere gorputztxoan, txirrindulariek ezin baitute askorik pisatu, Rabobanek alde batera uzteko! Rabobank taldearen ausardia aipatzekoa, nahiago izan zuten garbi jokatu Tourra irabaztea baino. Zorionak! Behingoz ondo, kirol legez eta garbi jokatu du norbaitek! Baita ere kontuan hartu behar da Tourra irabazi duen taldeak txirrindularitza utziko duela eta baita ere bere zuzendariak, Johan Bruyneelek. Aipatzekoa eta gogoratzekoa Lance Amrstrongekin zazpi tour irabazi zituela. Susmatzekoa da zenbat zikinkeria ikusiko zuen txirrindularitza uzteko. Alejandro Valverderi ez diote mundiala korritzen utziko. Rijsek aitortu zuen 1.996. urtean dopatu egin zela, justu urte horretan Indurain seigarren tourrarengatik borrokatzen ari zenean. Normala al da pertsona batek minbizia eduki eta gero jarraian zazpi Tour irabaztea? Ez, nik pertsona batzuk ezagutu ditut minbiziarekin eta beraien hurrengo tokia zoritxarrez, hilerria izan zen. Marco Pantani eskalatzaile handia hilik agertu zen. Zenbat gauza sartuko ote zituen gorputzean?

Ezin daiteke bost mendate igo egun batean: lehenengoa hirugarren mailakoa, bigarrena bigarren mailakoa, hirugarrena lehen mailakoa, eta azkenekoa mendate berezia. Kontuan hartu behar da etapa guztiak ehun kilometro baina dexente gehiago dituztela. Hiru aste horrela inork ezin ditzake egin. Aipatzekoa da azken aurreko egunean 54 kilometroko erlojupekoan lehenengo sailkatuek daukaten guztia eman behar zutela.

Baina, zein etorkizun du txirrindularitzak? Zein da konponbidea ? Pertsona zentzudun batek nahiago izango du osasun ona edukitzea eta bizitza ona egitea, lehenengo bizi egin behar baita; baina nik konpobide argi bat ikusten dut: 80 eta 100 kilometro arteko etapak egin, erlojupekoa denean 30 kilometro jartzea eta etaparen hurrengo egunean atsedena egitea indarrak berreskuratzeko. Hau bai izango zela kirola egitea. Niri txirrindularitza ikustea gustatzen zait baina gaur egungo egoeran ez dut ikusiko ez zaidalako kirola iruditzen, engainatua sentitu naizelako.Uste dut eta nahi dut txirrindularitza garbitzea, baina usteak erdi ustel!!.

Julen Ulanga

PASARELA FAMATUETARA IRISTEKO BIDEA.

2007-11-23T03:00:00.000-08:00

Urte honetan zehar berri hau oso polemikoa izan da. Mundu osoan barrena zabaldu da zenbait modeloren heriotza gutxiegi jateagatik. Bi kasu ezagun daude:

· Bata, Luisel Ramosena, Uruguaykoa, 22 urte besterik ez zuen eta desfile baten erdian hil egin zen. Egun batzuk jan gabe zeramatzan eta horrek arnas geldiunea eragin zion eta heriotza.

· Bestea, Ana Carolina Reston-ena da. Brazilgo neska 21 urtekoa zen, Sao Pauloko ospitalean hil zen anorexiak eragindako infekzio larri batengatik. Argazkian ateratzen dena neska hauxe da.

D&C Doltxe & Cabaña

Zoritxarrez, neska hauek ez dute beste irtenbiderik, bestela diseinugile famatuek ez baitituzte kontratatzen. Bidai hau hasten dutenetik bukatzen dutenera arte, oso luzea eta latza da. Ogibide honek amaiera ugari izan litzake, horietako batzuk oso dramatikoak. Lanbide honetan kategoriaz igotzen zaren heinean, osasuna jaisten doa. Diseinugileek inposatutako neurri zorrotzak lortzearren, neska hauek haien bizitzak apurtzen dituzte, esaterako, jateari uzten diote eta drogaren munduan sartzen. Hau kate gaizto bat da: drogek gosea kentzen dizute, hau dela eta jateari uko egiten diote eta horrela argaldu egiten dira. Bigarren arazoa hauxe da: beharrezko argaltasuna lortzerakoan, horrela mantentzea. Beste aldetik, diseinugileak nahi duten irudia lortzeko operatzea aholkatzen diete. Jakina, ez badiete kasurik egiten kalera doaz. Ez dago dudarik hortaz, beraien ametsa egia bihurtzeko beren osasuna kaltetu egin behar dutela. Esan beharra dago, gai hau ez dela jolasa, egunero jendearen bizitza arrisku bizian dagoelako. Beraz, hobe da osasuntsu bizitzea hain famatua ez izaten, eta ez arazo larrietan (droga, anorexia, bulimia, operazio gehiegi egitea...) sartzea nahiz eta gailurreraino iritsi.

ADIERAZPEN ASKATASUNA

2007-11-23T02:45:00.000-08:00

Uztaileko arratsalde batean izan zen berria. Auzitegi Nazionaleko Del Olmo epaileak “El Jueves” aldizkaria bahitzea erabaki zuen, bere azala iraingarria zela argudiatuz; azal horretan, Asturiasko Printze-Printzesak larrua jotzen zuten bitartean, Zapateroren 2.500 €-ko haur jaioberrientzako diru laguntzari buruz hizketan ageri ziren.

Egia da portada hark ez zuela inongo errespeturik, baina barre egiteko egokia iruditu zitzaidan. Izan ere, Espainiar Estatuan monarkia beti Mallorcan belauntziekin, Eguberrietako postaletan edota urriaren 12ko desfile militarrean ikusi ohi dugu eta beti serio hitz egin behar beraiei buruz. Azal harekin ordea, monarkia bera ekintza natural batean irudikatua zegoen eta monarkiaren egitekoa mahai gainean ipintzen zen, eztabaidagai izan zedin.

Hala ere, azala edozein izaki ere, larriena ez da azal horren edukia baizik eta azal hori kaleratzea eragoztea. Euskal Herrian tamalez ohituak bagaude ere zentsurak pairatzera bizi dugun arazo politikoaren ondorio gisa, egoera hau ustezko estatu demokratiko batean onartezina da demokrazia beraren kontra doalako. Izan ere, demokrazia batean gure iritziak inongo arazorik gabe egin badaitezke, nola ulertu hori iritzi edo kritikak galeraztearekin? Edozein ideia bada azalgarri eta zilegi adierazpen askatasunaren baitan, nola eragotzi daiteke ideia horien azalpena?.

Egoera honen inguruan, datu batzuk eman nahi nituzke. Euskal Herrian azken 10 urteotan denok gogoratzen ditugu adierazpen askatasunari ezarritako “askatasun eremuak”. Batetik ezker abertzaleari lotutako komunikabideak zirelako Egin egunkaria eta Egin Irratia itxi zituen Polizia Nazionalak 1997. urtean; sumario berean Pepe Rei-k zuzendutako Ardi Beltza aldizkaria ere itxi zuten. 2003. urtean Euskaldunon Egunkaria-ri egokitu zitzaion txanda, ETAren sare mediatikoa zela argudiatu zen orduan eta Guardia Zibila bidali zuten Egunkaria itxi zezan. Egunkaria euskaraz zegoen komunikabide bakarra zelako itxi zuten aitortu nahi edo aitortu nahi ez; garai haietan txapapotez blai zegoen gobernuak inkestetan puntuak berreskuratzeko operazio judizial-elektoral bat behar baitzuen; eta horretarako dena ETA zela kanpainapean Egunkaria lurperatu zuten.

Arazoa beraz ez da dirudiena bezain arina eta galdera honakoa da: Erabateko demokrazia batean adierazpen askatasunak mugarik eduki behar al du? Nire iritziz ez, bidea ez baita sekula izango komunikabideak ixtea. Artikulu batean iraindua sentitu den pertsonak nire ustez bide judizialak (ohore eta izenaren aurkako akusazioak etab.) jorratu beharko lituzke. Bestela, komunikabideen itxiera onartzen hasten baldin bagara, azkenean demokrazia batean usteak, iritziak, pentsakera kritikoak, ikuspuntu desberdinak etab. bermatu behar dituzten komunikabideak, hauek anitzak (gizartea bera bezalakoa) izanik ere, ez baitira osotasunez kaleratuko ; eta ustezko demokraziaren “defentsan” demokrazia bera sasidemokrazi bat bilakatu baitzaigu. Eta hau da tamalez ildo honetako er

abaki judizialekin Espainiar Estatuan gerta dakiekeena. Eskerrak Liztor hor egongoden!!

Ulanga hire artikulua ez zatek bat ere gustatu zarzuelakoei!!!!

Aitor Ulanga

Komumunikabideen boterea

2007-11-23T02:35:00.000-08:00

Denok daukagu komunikabideek daukaten boterearen berri. Hauek egunero gertatzen denaren berri ematen digute, baina askok euren buruari egiten dioten galdera hauxe da: Komunikabideak objektiboak dira? Honi buruz hitz egingo dizuet artikulu honetan, hasteko, eta frogatzeko komunikabide guztiak ez direla objektiboak hementxe duzue adibide bat:

Nork esan dezake hau objektiboa dela? Komunikabide batzuk objektiboak ez direla argi gelditu dela uste dut. Hala eta guztiz ere, esan beharra dago guztiz objektiboa izatea oso zaila dela, baina nahiz eta gezurrak ez esatea ez den hain zaila, komunikabide gehienek gezurrak barra barra esaten dituzte eta hori ez da okerrena, okerrena honen ondorioz arazo eta eztabaida asko sortzen direla eta komunikabideek jendearen pentsakeran eragin handia dutela da.

Honetaz gain, aipatu beharra dago azkenaldian hain modan dagoen hitz bat: “morboa”, komunikabideek esaten dituzten gezur gehienak morboa sortzeko izaten dira eta batez ere, diru gehiago irabazteko.

Horregatik artikulu hau irakurtzen duten guztiak bultza nahiko nituzke irakurtzen duten guztia ez sinestera, zeren eta atsotitz Japoniar batek dioen bezala: “Irakurtzen duzun guztia sinesten baduzu, hobe ez irakurri”

OHARRA: zuek morroi bizkorrak zartenez, ea aurkitzen dituzuen argazki-oineko bi lerroetan dauden lau gezurrak (gehienez 16 segundu erabili)

Oier Izulain

KLASEETATIK JOAN DIRENENTZAT

2007-11-23T02:26:00.000-08:00

Urte honetan aurrekoetan ez bezala ikastetxetik jende asko joan da. Unibertsitatera joan direnak alde batera utzita, irakasle batzuk eskola utzi dute. Gainera ezinezkoa izango da klase horiek berriro ikustea.

Alde batetik Patxi Ezkiaga dugu, bere bizitza klase ematea zen. Noizbait zeregin handiagoaren bat bazuen eskolatik kanpo, amorru handia sentitzen zuen joan beharragatik. Patxiren klaseetan besteetan baino lan gehiago egiten zenuen, bere sentimenduez kutsatzen zintuelako. Zoritxarrez izan duen gaixotasunarengatik ezin izango dugu klaseren bat berriro berarekin eduki eta ikasle berriak ez dira bere energiaz kutsatuko.

“Ez zaudete topen de dios”

Beste aldetik Xabier Galardi dugu. Filosofia irakasle bikaina eta pertsona hobeagoa. Zaila izango da bere metodoak ahaztea, batzuk ez ziren onenak batxillergoko ikasle batentzat baina azkenean denbora pixka bat sartuta dena ikasten zenuen oso erraz.

“Hain xuxen…/ Interesgarria benetan /Cojon de gorrion zurdo”

Azkenik eta ez honengatik garrantzi gutxiagokoa, ”the last but not the least”, Belen Alboniga. Klaseak emateko era arraroa zuen, baino klaseetatik zerbait gehiago jakinda ateratzen zinen. Gainera beti ahalik eta hoberen tratatzen zintuen eta pazientzia handia zuen denekin.

“Jakin badakizue...”

Pertsona guzti hauei hoberena opa diet. Zorte ona izan!!!

Iker Pedrosa

Euskarazko e-maila

2007-11-23T02:19:00.000-08:00

Posta elektronikoko zerbizua eskaintzen duten zerbitzari asko aurkitu dezakegu interneten: hotmail, yahoo, etab. Baina orain arte ez zegoen euskerazko posta elektronikoko zerbitzua eskaintzen zuen zerbitzaririk, hutsune hau bete egin da. Behingoz euskaldunok gure hizkuntzan dagoen posta elektronikoa edukitzeko aukera izango dugu. Zerbitzua doakoa da eta kontu berria egiteko www.euskalerria.org webean sartu behar da. Euskalerria.org ez da soilik e-mail zerbitzua eskaintzen duen orria, honez gain berriak, hiztegiak, entziklopediak, web bilatzailea, jokoak eta bestelako zerbitzuak aurkitu ditzakegu. Benetan aukera ederra da gure hizkuntza bultzatzeko, eta Liztor aldizkariak ez du aukera hau galdu nahi, horregatik gaurtik aurrera gure posta elektronikoa honakoa izango da liztor@euskalerria.org (email zaharra ere mantenduko dugu). Denok dakigu Internet eta teknologi berriak geroz eta gehiago erabiltzen direla gure bizitzan, honelako lekuak sustatuz gure hizkuntzaren egonkortasuna bermatuko dugu, sarean leku bat egingo diogu-eta.

Ander Edo

Liztor aldizkaria (iragarkiak)

2007-11-14T07:02:00.000-08:00

Euskal kanturik onena

2007-11-09T13:33:00.000-08:00

AURKI...

2007-10-26T14:24:00.000-07:00

Hau bakarrik hasiera da. 1 eta 2 zenbakiak jarri ditugu. Hurrengo astean 3 eta 4 a izango dituzue, eta hemendik aurrera argitaratzen ditugun zenbaki guztiak blog ean izango dituzue. Ez ahaztu artikuluak komentatu ditzakezula. Besterik gabe AGUR.

LIZTOR (2 zenbakia)

2007-10-26T14:08:00.000-07:00

Kaixo lagunok! Ongi etorri gure aldizkariko bigarren zenbaki honetara! Berriro ere gustuko baduzue, zuen esku artean duzuen aldizkari honetaz gozatzera gonbidatzen zaituztegu eta idazteko asmoa baduzue bertan idaztera ere gonbidatzen zaituztegu noski. Horretarako gogoratu euskaraz nahi duzuen edozein gairi buruz idaztea aski duzuela eta hau gure helbide elektronikora ( liztor@euskalerria.org) bidaltzea. Besterik gabe, gustuko izango zaizuenaren itxaropenarekin igortzen dizuegu ale berri hau. Eskerrik asko guztioi!

Zenbaki honetan parte hartu dute:

Oier Izulain, Ander Edo, Iker Pedrosa, Iban Rodriguez, Laila Ajiba, Aitor Ulanga, Julen Ulanga,

Eskerrik asko guztioi

Heldu korrikari

2007-10-26T13:54:00.000-07:00

Badator Korrikaren 15. edizioa. Martxoaren 22an hasiko da Karrantzan eta apirilaren 1ean bukatuko Iruñean. Donostiara martxoaren 24ean (larunbata) iritsiko da 16:56tan.

Korrika 15ek euskal emakumea omenduko du, euskal emakumeek gure hizkuntzaren transmisioan izan duten garrantzia eta ezinbesteko papera goraipatu nahi dituelako. Korrika 15en mezua HELDU izango da, heldu HERRIARI,helduHITZARI,heldu ELKARLANARI,helduEUSKARARI,heldu LEKUKOARI…

Beti bezala, aurten ere Korrikak bere abestia izango du. Niko Etxartek jarri dizkio musika eta hitza korrika 15eko kantari. Euskal Herriko beste hainbat abeslariren laguntza izan du Niko Etxartek. “Barricada” taldeko "Drogas"etik hasi eta Zuberoako "Amaren alabak" talderaino. Euskara erabiltzeko deia egiten da kantan, bera baita "nortasunaren mintzaira".

Euskal Herriari bira ematen dion korrikaren kilometroak saltzen diren moduan, Interneten antolatu duten Ziberkorrikan mezua mundu osoan barreiatuko duten ziberlekukoak saldu nahi dira. Sarean saltzen diren lekuko digital guztiekin eta erosleen izen-abizen guztiekin Ziberkorrika zerrenda osatuz joango dira eta mundu mailako Korrikaren ibilbide birtuala egingo dute. Ziberlekukoaren gutxieneko salneurria 50 eurokoa da.

Bukatzeko hemen dituzue Korrikan parte hartu nahi baduzue egin ditzakezuen gauzen zerrenda:

Korrika kulturalak antolatuko dituen ekitaldiez gozatu.
Munduko itzulia egingo duen Ziberkorrikan parte hartu.
Martxoaren 22an Karrantzara eta apirilaren 1ean Iruñeara joanez, Korrika 15en hasieran eta amaieran parte hartu.
Korrika zure herrira edo hirira iristean bertan korrika egin.
Ekonomikoki lagundu « http://www.korrika.org » web orrian aurki dezakezun kontuan dirua sartzen edo korrika 15en oroigarriak erosten.

HELDU KORRIKARI!!!

Oier Izulain

Bakea, denon eskubide

2007-10-26T13:37:00.000-07:00

Urtarrila amaieran ospatu zen Ghandiren heriotzaren urteurrena probextuz, bakearen inguruko artikulu hau idatziko dut. Aski ezaguna da denontzako Ghandi bakezale indiarrak bake eta elkarbizitzaren alde egin zuen apustu irmoa eta berak esan zuen honako esaldi famatu hau: “ Ez dago biderik bakearentzat, bakea da bidea”. Urte asko igaro diren arren, ez gara gai izan lelo hau hartu eta bera oinarri izanik gizartea eraikitzeko.

Ghandik esaldi hura esan ostean, mundu mailako agintariek eta leku batzuetako erakunde terroristek entzungor egin zioten eta guda estrategiekin aurrera jarraitu zuten, horren adibide dira esaterako; Vietnamgo gerra, Txetxeniako gatazka, Euskal Herrian ETA, Kolonbian FARC edota orain dela urte gutxi Azoreetako hirukoteak Irak inbaditzeko hartu zuen legez kanpoko erabakia. Ez dugu ezer aurreratu. Gure garapena urte guzti hauetan zehar soilik teknologikoa izan dela esan dezakegu lasai asko, gizakiak lehen bezala jarraitzen baitu jokatzen gizarte bat eraikitzeko orduan, baita gatazkei aurre egiterako garaian ere.

Argi dagoena da guda bat egitea erabakitzeak dituen interes ekonomikoak agerikoak eta nabariak direla; aitzakia politikoa izanik ere, guda osoen sakoneko arrazoiak ekonomikoak baitira. AEBen politika da horren erakusle garbia gaur egungo mundu honetan. Irak demokrazia eta askatasunaren baitan inbaditu zuten, hura askatzeko asmoz. Mozorroak oso polita dirudi, baina denok dakigu Irak-eko legez kanpoko gudaren arrazoia petrolioa zela, eta bide batez, AEB-k Golko inguruan petrolio kontrolaren oinarriak finkatzea, hartara bere ekonomiak behar dituen baliabide energetikoak beste belaunaldi batentzat bermatuak egoteko. Guztiz gaitzesgarria eta onartezina. Izan ere, demagun Bush-en gobernuak esandako gezurrak egia zirela eta demokrazia eta askatasuna eraman nahi zizkiotela Irakeko herriari. Honek makina bat galdera dakartza demokraziaren funtsezko oinarriei buruz. Demokrazia eta askatasuna bonben eta hildakoen bidez zabaldu behar al dira? Demokrazia ez al dute herri bakoitzeko herritarrek erabaki behar? Askatasuna al da herriak txikitzea, zibilak akatzea edota 200.000 tropa atzerritarrez herri bat josia egotea? Demokrazia demokraziatik kanpoko legeen bidez eginiko guda baten bidez hedatzen al da? Horrela jarrai nezake beste orri bat betez, baina alferrik izango litzateke AEBetako presidenteak bere baitan jarraituko duelako. Denon begibistan dagoena da guda hau porrot bat izan dela, ez baita nahi zen ezer lortu: suntsipen handiko armak ez dira inon ageri, demokrazia bat ezartzeak ezinezkoa dirudi, petrolio horniketa eskuratzeak oso zaila dirudi, egunero 100 hildakotik gora dituzte, islamiar terrorismoarentzako harrobi bilakatu da, guda zibil bat oso litekeena da...

Gure herrian bertan ere, bakearen alde gaudenok ikaragarrizko zaplastekoa jaso genuen iragan abenduaren 30ean; ETAk Barajasen burutu zuen ekintza lazgarri, gaitzesgarri eta onartezin harekin. Itxaropentsu ginen su etenarekin piztu zen itxaropena oraingoan ondo amaituko zelakoan, aukera inoiz baino hobea zelako. Hala ere, sinestuta nago bakean, ETArik gabeko Euskal Herri batean biziko naizela, ezerk ez duelako justifikatzen desberdin pentsatzen dutenen hilketa. Jakitun naiz, ez dela bide erraza eta hau unerik egokiena hori esateko; baina euskaldunok ezin dugu onartu XXI. mendean inori ordezkatu gabe talde terrorista batek gure izenean hitz egin eta hiltzea, gure izenean ez dugulako onartzen desberdin pentsatzen dutenak akabatzea eta gure izenean guk hitz egiten dugulako. Horregatik, eskatu nahi dut bakean biziko garen Euskal Herri bat, non bakoitzak egoki deritzona defenda dezakeen eta botoak baditu, bere usteak aplika; bakea azkenean gu guztion eskubidea delako eta gu guztiok ikusiko dugun zerbait, lehenago edo beranduago.

Aitor Ulanga Ganuza

Ume soldaduak

2007-10-26T13:18:00.000-07:00

Asko dira gerrak uzten dituen aztarnak, artikulu honetan deigarrienetako bat aztertuko dugu, ume soldaduen kasua.

Gezurra badirudi ere 300.000 eta 500.000 tartean dago ume soldaduen kopurua, neskak zein mutilek jasaten dute esklabutza mota hau. Afrikan ematen da gehien bat (Uganda, Kongo, Liberia, Boli Kosta), baina badira beste eskualde asko non umeak soldadu gisa erabiliak izaten dira: Myanmar, Sri Lanka (Asia) eta Kolonbia.

Baina zergatik umeak?

Umeek ez dituzte nagusien aginduak eztabaidatzen eta hauxe da edozein soldaduaren oinarrizko araua.

Zertarako?

Lan askotarako erabiliak izaten dira borroka, sukaldaritza, erizaintza, esklabu sexualak…

Nola?

Batzuk “bolondres” moduan aurkezten dute beren burua, beren familia guztia gerran hil delako, pobrezia dela eta edo familia barnean arazoak dituztelako eta beste asko bahitu egiten dituzte eta entrenamendu esparruetara bidaltzen, han helduekin batera “irakaskuntza” militarra izan dezaten. Tratu bortitzak eta bizi baldintza negargarriak jasaten dituzte talde militarraren barruan, eta batzuetan hau dela eta hil egiten dira. Alkohola eta drogak ematen dizkiete gogorrago jarduteko borrokan, hasi baino lehen balen aurkako “botikak” ematen dizkiete beldurrik ez izateko (argi dagoenez botika hauek ez dira existizen).

Irtenbideak:

Oso zaila da egoera honi amaiera ematea. Gobernuz Kanpoko Erakundeek (GKEek) zailtasun asko izaten dituzte umeak askatzeko, askotan militar buruek ez dute onartzen umerik daukatenik edo ez dituzte askatu nahi, eta nesken kasuan generalarekin “ezkonduta” daudela diote. Baina arazoak ez dira taldetik ateratzean bukatzen, orduan birmoldatze prozesu zail bat hasten da. Umeek beren betiko bizitzara bueltatzea ez da batere erreza, batzuetan beren gurasoek ez dituzte onartzen edo beren itzulera ez dute begi onez ikusten oso pobreak baitira eta umeak “aho bat gehiago” suposatzen duelako. Nesken kasuan jasotako abusu sexualengatik ez dituzte haien komunitateetan berriro onartzen batzuetan. Eta honi guztiari, gerraren ondorioz jasaten dituzten trauma psikologikoak gehitu behar zaizkio.

Zer egin?:

Egin behar dugun lehenengo gauza arazoa ikuskatzea da, hau da, begiak ireki. Eta nola egin hau? Informatu zaitez, ez ezazu beste alde batera begiratu telebistak edo prentsak gaiari buruz hitz egiten dutenean. Baina hau ez da nahikoa, kontzientziatu egin behar dugu, arazoari buruz gogoeta sakona egin eta enpatia praktikan jarri. Eta bukatzeko gobernariak presionatu egin behar dira, gogoratu gobernariak (gutxienez hemen) herriak aukeratzen dituela. Agian pentsatuko duzu ezer gutxi egin dezakegula, baina gogoratu:

“Itsasoa ur tantaz osatuta dago.” Ander Edo

RODRIGEZ DOKTOREA

2007-10-26T08:07:00.000-07:00

SAN BALENTIN = Kupido= Aingerutxo potolo eta leloa. Punteria ipurtzuloan dauka bere maitasun oh arku ziztrin horrekin tiro egitean. Sexu liberala aldarrikatu zenetik jubilatu egin zitekeen.

Mutilentzat: Diru barik nago eta orain neska lagunari zerbait oparitu behar… beno agian bere errekonpentsa izango du, nork daki? (honek “hidalgia”-ren puntu guztiak apurtzen ditu, baina “Badena: bada; eta ez dena: ez da.” Eta kitto!)

Neskentzat: Joe, kriston arazoa dut. Mutil lagunaz presumitu behar dut eta oraindik ez dut bat aurkitu. DIOS!. Hau pentsatzen dago klaseko neska katxarroena eta nola ez xarmantena bere aurretik pasatzen denean, neska hau bestearen aurrean gelditzen da eta zera esaten du: “Osea neska… ene mutil puska ikusi beharko zenuke. Bere bizepsak, bere aurpegia, bere… Jainkoak marraztu duela dirudi.” Orduan sortzen da krispazioa, eta estrategia makiavelikoak sortzen dira mutil bat lortzearren.

Opariak: Jakina da jende azkarrena kutreena dela, eta opari on baten ondorioak bikotearen haustura ekartzen dutela.

Anonimoak: Hauek kriston sasikumekeria dira, eta bat izaten duzunean izorratu egin zaituztela ohartzen zara. Hasteko, ez dakizu egia ala gezurra den, gero gauzak txarrera doaz: “Nork idatzi ote du mutil batek ala neska batek?”.

Hori bai, ez larritu, gehienetan txantxak dira eta.

Mitoa: Bikoterik ez daukaten MUTILEK, ahalik eta alkohol gehiena erosten dute supermerkatu batean. Gero lagun baten etxera joaten dira eta bertan zenbait lagun elkartzen dira. Bertan alkohol guztiarekin bukatu eta telebista eta DVD-a pisten dute film pornoen maratoi bat egiteko edo.

MESEDEZ, EZ PENTSA HALAKORIK EGITEN DUTENIK. EGUN NORMAL BAT DA MUTILZAHARRENTZAT. Neskazaharrek berriz krispaturik egoten oi dira egun horretan.

Iban Rodriguez

Espazioa esploratzea berriz ere helburu bihurtu da

2007-10-26T07:50:00.000-07:00

Txinak, Errusiak, Indiak, Japoniak, Europak eta Estatu Batuek gizakia berriro Ilargira eraman nahi dute. Estatubatuarren asmoa Ilargian base iraunkor bat jartzea da. Base hau ordea, beste herrialde batzuen laguntzarekin eraiki nahi dute, Nazioarteko Espazio Estazioa eredutzat hartu dute honetarako. Base hau eraikitzean Ilargia esploratu, eguzki-sistema ikertu eta beste planetetara misioak bidaltzeko erabiliko lukete. Izan ere Ilargian grabitate gutxiago dagoenez, erregai gutxiago erabili daiteke. Askoren ustez orain dela berrogei urte gertatutakoa berregin nahi dute eta azken aldi honetan izan dituen problemak ahaztu.

Martitzerako bidaiei buruz berriz, estatubatuarrek eta europarrek dute helburu. Estatubatuarrek bi espazio-ontzi berri eraikiko dituzte. Lehenengoa esplorazio ontzia izango da eta bertan ibilgailu bat eramango dute. Bigarrena astronautak eta zama Martitzera bidaltzeko erabiliko da. Europak aldiz, Aurora programan tripulatutako bidai bat nahi du 2030erako.

Beste alde batetik, enpresa pribatuek espaziora jendea bidaltzeko planak dituzte. Virgin Atlantic da enpresa hauen adibide garbiena, ehun eta berrogeita hamar mila euroren truke espaziorako bidai bat kontratatuko ahal dela esan du. Virginek, X saria lortu du, sari honek espaziorako bidaietan ekimen pribatua bultzatu nahi du.

Iker Pedrosa

Zein ondo bizi diren Errealeko jokalariak!

2007-10-26T07:44:00.000-07:00

Dagoeneko Espainiako ligaren erdia baino gehiago pasa da eta horrela jarraituez gero bigarren mailara jaitsiko dira. Honen harira, galdera hauek bururatu zaizkit nire artean:

- Baina justua al da inmigrante esplotatu batzuek 500 euro irabaztea hilaren bukaeran eta Errealeko jokalariek milioika milioi irabaztea egunean bi ordu entrenatzeagatik?

- Justua al da Errealeko jokalariek hainbeste diru irabaztea, eta bien bitartean guk, ikasleok, egunean sei ordu eskolan eta horrez gain etxeko lanak egiten eta azterketak prestatzen jardun eta ezer ez kobratzea?

Hala ere, Erreala Gipuzkoako sentimendu bat dela onartu behar dugu, baina ez zait ondo iruditzen hainbeste kobratzea. Athletic-ek baino askoz jarraitzaile hobeak ditugu. Gora Erreala!

Julen Ulanga

LIZTOR ( 1 zenbakia)

2007-10-26T07:18:00.000-07:00

Kaixo lagunok! Ongi etorri Liztor aldizkari berri honetara! Eskuartean duzuen aldizkari hau, bertan idatzi dugunon artean egin dugu eta gustuko baduzue bertan idaztera ere gonbidatzen zaituztegu.Horretarako gogoa eta zuek pentsatuko gai bat baino ez duzue behar, edozein gai hauta dezakezue eta horri buruz pentsatzen duzuena idatzi dezakezue orri hauetan; hizkuntza bezala noski, euskara erabiliz.

Besterik gabe, adiskideok, goza ezazue gustuko baduzue, gure aldizkariaren lehen atalaz eta disfruta ezazue gabonetako oporretaz!. URTE BERRI ON GUZTIOI!

Zenbaki honetan parte hartu dutenak:

Marta Garcia, Oier Izulain, Ander Edo,Iker Pedrosa, Iban Rodríguez, Iban Ruiz, Marta Ruiz de Gauna, Aitor Ulanga, Julen Ulanga.

Formula 1 gelditu egin da hurrengo urtera arte

2007-10-26T07:13:00.000-07:00

Schumacherren, Cosworthen eta Michelinen azken lasterketa izateaz gain, Brasilgo Sari Nagusia motorrentzat ere ziklo baten amaiera izan zen. Betidanik 1 Formula motorren erakusleiho izan da, fama asko lortu baitute. Baina hau bukatu egin da, motorrak hurrengo hiru urteetarako berdinak izango baitira.

Erabaki honen atzean kostu murrizketaren estrategia dago. Azken urteetan, 1 Formulako eskuderia asko joan egin dira, gehienak diruagatik. Kostuek izugarri egin dute gora eta horrek erakargarritasuna kentzen dio, batez ere, kirol honetan sartzeko asmotan dauden talde berriei.

Beraz, hurrengo urteetan motorren bilakaera gelditu egingo da. Txapelketa aurrera dihoan heinean motorren batean arazoren bat topatuz gero, eskuderiek FIAri aldatzeko baimena eskatu beharko diote. Kanpoko beste elementu batzuk, aldiz, askatasun osoz alda daitezke.

Aldaketa horrek beste aldaketa garrantzitsu bat izango du lagun 2008an. Izan ere, orduan FIAk motorraren elektronika estandarra inposatuko du, talde guztientzat berdina. Mekanika zenbat eta antzekoagoa izan, gidariak orduan eta garrantzi gehiago izango du. Hau da FIA azken urte hauetan bilatzen ari izan dena, ahal den heinean gidariak garrantzitsuagoak egitea. Honek ematen baitio ikuskizuna eta bizitasuna kirol honi.

Aurten berriz, lehengo urterako zeuden zenbait lege aldatu ditu FIAk, Ferrari berriro talde nagusien artean egon zedin. Kosta egin zaion arren, azkenean Ferrarik nagusitasuna lortu du bigarren erdiko lasterketa gehienetan. Alonso eta Renault aldiz lehen zatian sendo egon dira, baina urtea aurrera joan ahala atzerantz egin dute.

Aurtengo urtearen analisia:

Lehengo urtean bezala, Alonsok Reanult kotxea zein azkarra zen erakutsi zuen. Lehen hiru lasterketak eroso irabazi ondoren, Europako lehenengo lasterketan Alonso bigarren gelditu zen Schumacherrren atzetik. Ferrariko gidariak erakutsi zuen urte honetako txapeldun izatea ez zela erraza izango. Hurrengo lasterketan, Europakoan berriro ere Ferrari goian egon zen.

Montmelon, Monakon, Silverstonen eta Montrealen Fernandok abiadura zuzena sartu eta lauak irabazi zituen. Michael bigarren gelditu zen guztietan, Monakon izan ezik. Non bere kotxea aparkatu zuen kalifikaziorako balio zuten entrenamenduetan, Alonsok bere bira azkarrena egin behar zuenean. Honengatik Schumacher azkena atera zen lasterketan.

Hemendik aurrera Ferrari nagusitu zen. AEBetan Renault-ek oso lasterketa iluna egin zuen, Michael lehenengo gelditu eta Alonso laugarren. Hurrengo lasterketa Montoyak 1 Formula utzi zuenekoa izan zen. Baina, baita ere, FIAk Renaulten masa mugikorra debekatu zuenekoa. Ferrarik min handia egin zion Renaulti Frantziako lasterketan. Hemendik aurrera Alonsok taktika defentsiboa aukeratu zuen.

Italian gertatu zena oso garrantzitsua da: Schumacherrek bere erretiroa iragartzen du, FIAk Alonso zigortzen du Massa “oztopatzeagatik” eta azkenik motorra puskatzen du. Schumacher bi puntura bakarrik gelditzen da.

Hurrengo lasterketa ez zen oso garrantzitsua izan txapelketa erabakitzeko, biek ez baitzuten lasterketa bukatu. Baina bai izan zen garrantzitsua Alonsok erakutsitako indarragatik. Kalifikazioko entrenamenduetan asturiarrak eta alemaniarrak, biek, bi segunduko zigorra jaso zuten. Lasterketan berriz, Fernandok inolako zailtasunik gabe aurre hartu zion Michaeli. Hau ahozabalik gelditu zen egin ziotenagatik. Pena handia izan zen gero Renaultekoak lasterketa ez bukatzea.

Txinan gertatutakoaz geroztik, Schumacherrek txapelketa bere poltsikoan zuela zirudien. Berriro irabazi zuen eta lidergoa lapurtu zion. Alonsok berriz, bere mekaniko traketsaren erruz, hogei segundu galdu zituen boxetan.

1 Formulan ezinezkoa da esatea norbaitek txapelketa irabazi duela, zerbait gerta daitekeelako. Eta holako zerbait gertatu zitzaion Michaeli, Japonian motorra hautsi zuen hogei bira baino gutxiago gelditzen zirenenan. Seguruenik Alonsok Txinan eta Japonian egindako presioagatik gelditu egin zen Ferrariare motorra.

Brasil, aurtengo azken lasterketa. Schumacherrek oso zaila zuen txapelketa irabaztea, are gehiago oraindik bere neumatiko bat lehertu zenean. Hala ere, bere bizitzako lasterketarik ederrenetako bat egin zuen. Azken postuetan egon ondoren, puntuatu egin zuen. Buttoni, Fisichelari eta Raikkoneni egindako aurreraketak gure begietan grabaturik geldituko dira betirako.

Hurrengo urtean zer gertatuko da? Nor izango da txapeldun? Alonso McLarenekin, Raikkonen Ferrarirekin, Kovalainen Renaultekin ala beste bat? Batek daki! Hurrengo urterako egindako aldaketak kontuan izanda hauetakoren bat aukeratzea izango litzateke errazena, baina 1 Formulan gauza asko gerta daitezke. Urte honetan gertatu den bezalakoa espero dugu 1 Formula gustatzen zaigunoi.

Iker Pedrosa

Kilometroak

2007-10-26T07:12:00.000-07:00

Urriaren bataren bezperatik prest nengoen jada. Goiz goizetik hasi zineten iristen. Ni zuen zain nengoen. Apaindua nengoen, maitale bat bere maitearen zain bezala nintzen. Baina zuek ez zineten horretan fijatu. Zortzietan nik kaleak txukun neuzkan; hamaiketarako ordea, botila, poltsa eta beste zerrikeriez beterik zeuden. Euskaldunon festa zen, baina gazteleraz egiten zenuten. “Viva el País Vasco” esatea besterik ez zenuten falta. Gehienek hauxe egin zenuten.

Baina, hala ere, bazeuden euskaraz egin zutenak. Elkarrekin jator egon zirenak, nahiz eta elkar ezagutu ez. Euskal Herrian baitzeuden, euskaldunen artean. Zuek alkoholaren edo beste edozein drogaren menpe erortzen zineten bitartean, hauek festa egin zuten, kilometroak egin zituzten, euskal festa egin zuten.

Iban Ruiz

Gaizki esaka gazteez, zergatik?

2007-10-26T07:06:00.000-07:00

Gaur egungo gazteek ez dugu balorazio onik, gehiago esango nuke, balorazio txarra dugula. Zergatik dugu fama txarra, edaten eta erretzen dugulako? Egia da edaten eta erretzen dugula, baina ez denek, batzuek bakarrik baizik, eta horiengatik ez dute gutaz ondo hitz egiten.

Baina horiek gazte batzuk dira bakarrik, ez dira gazte guztiak. Zein gogoratzen da umila den eta laguntzen duen gazte batetaz? Bere ondokoak gogoratzen dira bakarrik eta hauek dira jarraitu behar ditugun ereduak, ahal bada behintzat.

Testu honekin esan nahi dut mota askotako gazteak daudela, onak eta txarrak, eta gazteek errespetu bat merezi dugula. Gaizki dauden gauzak ere esan behar zaizkigu guk ere autokritika bat egiteko, hau da, konturatzeko.

Gutaz gaizki esaka aritzen diren pertsona horiei gogoratuko nieke gustura beraiek nolakoak ziren gaztetan, ematen duelako batzuei ahaztu egiten zaiela gazte izan zirela. Etorkizuna geure esku dago, bai onerako eta bai txarrerako.

Julen Ulanga(DBH2 A)

Euskara

2007-10-26T07:04:00.000-07:00

Orain dela gutxi ospatu berri dugun Euskararen Nazioarteko Eguna dela eta euskararen inguruan hainbat iritzi eta gogoeta egiteko aprobetxatuko dut.

Jakitun naiz ez dela erraza ( ziurrenik batzuetan, behar baino gehiagotan euskara politikarekin nahasten dutelako batzuk) euskararen inguruan mintzatzea, pertsona bakoitzak ikusten eta erabakitzen duelako ze jarrera hartu hizkuntzen aurrean; baina hala ere euskararen inguruan hitz egingo dut artikulu honetan.

Euskara Euskal Herriko berezko hizkuntza da. Hau da, guk euskaldunok dugun berezko hizkuntza, Espainiak gaztelania duen bezala; hori bai berezko hizkuntza izan arren, hizkuntza txikien multzoan dagoelako, euskarak hil nahi ez badu behintzat, bide zail bat du jorratzeke, historian zehar izan duen bezala.

Egun euskararen egoera Euskal Herrian bertan, oso bestelakoa da aztertzen dugun lurraldearen arabera. Euskadin ondo dagoela esan genezake, nahiz eta oraindik euskaraz erabat bizitzeko aukerak oso murritzak diren. Alde honetatik azken bi hamarkadetan gobernutik euskara bultzatzeak eta jendeak euskararen aurrean duen jarrera baikorrak euskararen osasun egoeraren hobetzea ekarri du. Ezin ahaztu dezakegu aldi berean, gizartetik, ikastetxetatik... euskararen alde egin den lana.

Nafarroan egoera bestelakoa da. Bertako gobernuak euskararekiko duen jarrera lotsagarria da eta euskara bultza eta zaindu beharrean eta herritar euskaldunen hizkuntza eskubideak bermatu, Sanz jaunaren gobernua ikastola eta euskaltegiei dirua kentzen, euskara fakultateetatik desagerrarazi nahian etab. ari da. Nafarroako gobernuaren jarrera benetan ulerkaitza da euskararen aurrean eta politikoki soilik uler daiteke, ez hizkuntza aldetik. Sanz da euskararekin burutu behar ez diren politiken eredu, euskararen gaian behintzat eta nire iritziz, nafar euskaldunen oinarrizko hizkuntza eskubideak bermatu beharko lituzke ( administrazioarekin euskaraz mintzatzea esaterako) eta ez eskubide horien aurka egin.

Iparralde da euskal lurraldeetatik euskara okerren dagoen lurraldea. Erietxean koma egoeran dagoela esan genezake. Ofizialtasunik ezak asko zailtzen du euskararen biziraupena; ez baitu euskararentzat bizitza publikoan inolako eremurik aitortzen. Gainera, Iparralden ahoz ahozko hizkuntzaren igorpena galtzen ari da eta horren adierazle da, euskara dakitenen artean, zahar gehiago daudela gazteak baino. Beraz, euskararen etorkizuna Iparralden benetan beltza ikusten dut; hizkuntzak ofizialtasunik ez badu oso zaila delako aurreraurratsak ematea eta belaunaldiz belaunaldiko igorpena galtzen bada, zaharrek hiltzean hizkuntza beraiekin hilerrira eramango dutelako, gazteei oinordetza bezala utzi gabe.

Euskarak Euskal Herrian duen osasun egoera aztertu ostean, orain bakoitzari dagokio euskararekiko bere konpromezua hartzea. Batzuei ez zaie axolako, beste batzuoi axola zaigu, hori jada bakoitzaren hautaketa zilegia da, bizitzaren aurrean burutzen diren gainontzeko hautaketak bezala. Euskararen helburua XXI. Mende honetan, globalizazioaren mende honetan, bete dadin nahi badugu eta museotako pieza bat bilakatu ez dadin, euskaraz bizitzen ahalegindu beharko gara, ahal dugun gehienetan.

Aitor Ulanga Ganuza.

Rodrigez doktorea

2007-10-26T07:02:00.000-07:00

Gure aldizkari honetan Iban Rodrigez ek gai bati buruz idatziko du. Gai bat proposatu nahi badiozue bidali itzazue ‘liztoraldizkaria@yahoo.es’-era . zenbaki honetako gaia AMODIOA da

Definizioa: Gizadiak asmatu duen gezurrik handienetakoa. Amodioaz ulertzen duguna erakarpena eta obsesioaren arteko nahasketa da.

Mutilek uste dutena: SEXUA

Neskek uste dutena : Hain kursia da, non ez du pena merezi, idaztea

Nola egin neska bat zuri ez urbiltzeko: Denok badakigu badaudela, nola esan… pertsona batzuk, zuregana hurbiltzen direnak eta zuk beraiei emozionalki min ez egitearren, ez diezu esaten: “Kriston neska itsusia haiz, mesedez ez hadi hurbildu nigana, ulertu al dun?”

Hau moral aldetik zenbait pertsonentzako ez dago ondo.

Horregatik zera proposatzen dizuet lagunok, zuei neska itsusi bat ez hurbiltzearren edozein kiroletaz hitz egiten hasi.

Kasualitatez neskak kirol horretaz jakingo balu, beste batera pasa eta operazio hau bizpahiru alditan errepikatu.

Ez baduzu lortu honela zu zauden lekutik joatea, ez larritu, oraindik zeozer gehiago egin dezakegu.

Politikaz hitz egiten hasi. Hau, ez da kirolarena bezain eraginkorra, baina neska bati kirola gustatzen bazaio, gehienetan ez zaio politika atsegin.

Hau guztia egin ondoren neska joatea eta berriro ez hurbiltzea ez baduzu lortu, gauza bakarra egin dezakezu. FRIKIA den zerbaitetaz hitz egitea, adib: Star Wars, Warhammer, Magic, Bideojokuak, etab.

Hala eta guztiz ere, ez baduzu lortu, korrika egin ezazu, zutaz OSO MAITEMINDUA dago.

Nola egin mutil bat zuri ez urbiltzeko: Ezinezkoa da. Guretzat, neskak eztia edo ardoa baino goxoagoak dira

Oharra: Mesedez, ligatzerakoan ez esan lagun bati laguntzeko; Oso laguna izan arren, gehienetan hark ligatuko baitu, nahiz eta neska hori kriston neska izan.

Oharra: Aldizkariak ez du bere idazleek idatzitakoari buruz( Rodrigez doktoreak bereziki) erantzungo

BA AL ZENEKIEN?

2007-10-26T06:38:00.000-07:00

Historia:

TITANIC: 1898an, “Titanic” itsasoratu baino 14 urte lehenago, Morgan Robertson itsasgizonak “Huskeria” izeneko eleberria idatzi zuen. Luxuzko barku bati buruz hitz egiten zuen. Untzi hau bere lehen bidaian hondoratu egiten da Atlantiar itsasoan izozmendi baten kontra talka egitean. Untzia munduko handiena zen eta hondoraezina omen. Bere bidaiariak aristokraziaren gorenak ziren. Ezbeharra gertatzean ez zegoen salbabiderako ontzi aski denentzat. Gainera untziaren izena sinesten ez baduzu ere “Titan” zen.

BITXIKERIA BATZUK:

-Historia osoan, 36 Aita Santu izan dira erailak eta 13 espetxeratuak edo atzerriratuak.

-Bere exekuzioaren aurreko gauean “Catalina Howard”-ek, Enrique VIII.aren bosgarren emazteak, bere lepamoztea entseatzea eskatu zuen.

-Carlos VII.ak jateari utzi zion eta gosez hil zen, pozoitua izateko beldurragatik.

-1879an Estatu Batuetan morfinaren adikzioari aurre egiteko substantzia bat sartu zuten: kokaina.

Hitzen jatorria:

OK: Hitz hau erabilienetariko bat bada ere, bere jatorriak eztabaida asko sortzen du. Teoria batek esaten du Estatu Batuetan, gerra zibilaren garaian, tropak koarteletara itzultzen zirenean hildakorik gabe, arbela handi batean “0 Killed” (0 hildako) jartzen zutela. Hortik dator “O.K.” espresioa, dena ondo dagoela jakinarazteko.

S O S: 1912an, “SOS” letrak laguntzarako dei internazional gisa ezarri zituzten . Itsaso elkarte internazionalak esan zuen hizki hauek “Save Our Souls”(gure arimak salbatu) hitzen laburdura zirela eta ez zutela beste esanahirik. “Hiru puntu -hiru marra -hiru puntu” (· · · - - - · · ·) gogoratzeko eta Morse kodean transmititzeko errazak dira. Morse kodean S=". . ." eta O="- - -" baitira.

TANKEA: Zergatik deitzen diogu tankea ibilgailu militar bati? Ingelesek beren asmakizuna kamuflatu egin nahi zutelako etsaiaren kontra, beren tropentzako ur edangarriaren tankea zela esanez.

Oier Izulain

ALKOHOLA GURE GIZARTEAN

2007-10-26T06:35:00.000-07:00

Alkohola hamalau eta hamasei urte tartean hasten da edaten gazteen artean, baina hamabi urtekoek ere edaten dute. Gaur egun oso normala da gazteen artean alkohola edatea edo erretzea, baina gure gizartean nahiz eta gaizki ikusita egon, normala iruditzen zaigu hau ikustea larunbat gauetan. Gazteak uste dugu honekin ondo pasatzen dugula, baina gauza txarrak ere ekar ditzake gure bizitzan. Adibidez gaztetan edaten hastean (normalki edanez), 25-30 urterekin konturatuko ginateke giltzurrunetan arazoren bat daukagula. Alkoholak efektu asko ditu eta edaten dutenek ez dakite alkohola nolakoa den. Bakarrik dibertsio moduko zerbait ikusten dute.

Alkohola likido bolatila eta kolore gabekoa da, edari fermentatuen artean aurkitzen dena. Alkoholaren kontzentrazioa handitzeko alanbike baten bidez fermentuak destilatzen dira, esate baterako whisky, vodka, tekila edo rona egiteko. Alkoholaren konposizio generoaren arabera kolorea, zaporea, usaina eta beste hainbat gauza aldatzen dituzte. Alkohola askotan adulteratu egiten da eta ez da kalitate eta osasun kontroletatik pasa, adibidez alkohol etilikoa. Egurretik eratorritako alkoholak itsupena sor lezake. Alkoholak 25-90 minutu inguru behar ditu odolera iristeko.

Askok pentsatzen dute alkohola pizgarri bat dela, baina gorputzaren mekanismoaren depresioaren ondorio da. Drogetan bezala alkoholak dosiaren arabera ondorio ezberdinak ditu: hasera batean gure hitzei eta ekintzei eragiten die, ondoren arnasketari eta azkenik asko edanez gero, intosikazioa gerta liteke, hau gertatzean koma etilikoan geratuko ginateke. Terapeutikoki alkohola ere erabiltzen da. Erdi Aroan adibidez gaixotasunak sendatzeko whiskya edaten zen (whisky hitzak gaelikoan “biziaren ura” esan nahi du). Alkohola margoak eta fabriketako hainbat gauza disolbatzeko ere erabiltzen da.

Alkoholak hainbat efektu ditu:

1- Chakras-en efektua: gorputzak dituen 7 gune psikiko eta sutilak.

2- Kanpo energetikoaren efektua.

Guraso batek eta gazte batek alkoholari buruz pentsatzen dutena.

Nola ikusten duzu alkohola gazteen artean?

GURASOA- Nire ustez gazteek ez luketen alkohola edan behar baina guk ezin dugu ezer egin hau gerta ez dadin.

GAZTEA- Nik uste dut oso gai larria dela, gazte asko alkohola oso goiz probatzen hasten direlako.

Zer iruditzen zaizu gazteei alkohola saltzea?

GUR- Gaizki iruditzen zait zeren askotan esaten da 18 urtekoei bakarrik saltzen zaiela bakarrik, baina 14 eta 17 urtekoei ere saltzen zaie, norbaitek hau gelditu beharko luke.

GAZ- Oso ondo iruditzen zait, neurriz saltzen badigute.

Uste al duzu alkoholarekin hobeto pasatzen dela?

GUR- Ez da beharrezkoa edatea ondo pasatzeko, beste hainbat gauza dituzte egiteko eta ez bakarrik alkohola edatea, batzuetan ez dute kontrolatzen eta arazoak sortzen dira.

GAZ- Ez.

Zer pentsatzen duzu lege berriari buruz? (16 urtekoei ere alkoholik ez saltzea)

GUR- Eragina edukiko luke gazteen artean, baina azkenean beraiei ez badiete saltzen beste pertsona bati eskatuko liokete alkohola erosteko. Beraz edaten jarraituko lukete.

GAZ- Niri legeak ez zaizkit batere gustatzen.

GABONAK DIRA

2007-10-26T06:33:00.000-07:00

-Alaitasunaren garaia:

Jendea irribarretsu dabil kalean barrena. Zoriontasun kolektibo antzeko bat ari da zabaltzen. Olentzerok bialiko dizkigu uhinak, ziurrenik. Eta Olentzero ez bada iragarkiak arduratuko dira horretaz. Gaur egun kolonia botaz, auto azkarrena erosiz (200 bat zaldi dituena) eta pare bat alditan ‘corporación dermoestetika’-tik pasaz, erotuta egon behar zenuke zoriontsu ez izateko. Egin beharko.

-Familiaren garaia:

Ikaragarrizko poza ematen du amonaren etxera iritsi eta familia osoa sukaldean ikustea, denak alai eta barrez (dena den uhinak ere iritsi zaizkie). Familiako kide guztiei eman behar zaie muxu eta guztiei galdera berdinak erantzun.

-Ai ene! Zenbat hazi zaren! Laster harrapatuko dituzu gurasoak!

-Bai jeje… (‘txarra litzateke urte batean aldatu ez izana’ pentsatzen duzu)

-Eta ikastola zer moduz?

-Ba ondo…(‘oporretan eta eskolari buruz hitz egin behar…’ )

-Eta nobiorik bai?

-Nik? Ez! (‘galdetzea beharrezkoa al zen?’ )

-Ui, ui, ui! Gorri-gorri jarri zara eta!

-Zera… aitak deitzen nau. (‘uf!’)

Bai, familia…

-Promesen garaia:

‘Urte berri on! 2007 zoriontsua izan dezazulea!’ truuuuut’ Dagoeneko pikodun txanoa jarri dizute buruan eta ez dakizu nola iritsi diren haimbeste serpentina zure sorbaldara. Urte berri bat asi zaigu. Bai adoretsua… etortzera ausartzea ere! Orain hasten zara beteko ez dituzun promesak egiten: ‘Hemendik aurrera fijo ez ditudala gauzak azken momenturako utziko’ ‘Aurten bai hasiko naizela dieta egiten’ eta elezahar bihurtu den ‘Erretzeari utziko diot’. Lehenengo bi egunetan bai betetzen dituzu baina gero…salda bero

-Oparien garaia:

Abenduak 25 goizeko zazpiak eta laurdenetan. ‘Olentzerooooooo! Olentzero etorri daaaa!’ Zure arreba txikiaren ohiuek zure amets lasaiatik atera zaituzte bat-batean eta buruan mailu batekin jo izan bazintuzte bezala geratu zara. ‘Me cagüen el casero este…’ Saloira abiatzen zara (zer erremedio) eta opariak irekitzen hastenzara begiak erdi itxita. ‘Bai, nahi nuena...zzz…’

Marta Garcia

Egiako haur txokoa egoera larrian

2007-10-26T06:32:00.000-07:00

Egiako haur txokoak 16 urte daramazki Egiako haurrei zerbitzu hezitzaile bat ematen. Gazte talde batek Egiako haurren aisialdi beharrak ikusirik, haur txokoaren egitasmo bat sortu eta aurrera eraman zuen. Bertan umeen aisialdia bete eta hezi egiten dituzte.

Baina Egiako haur txokoa egoera larrian aurkitzen da diru kontuak direla medio. 16 urte hauetan zehar udaletxearen diru laguntza jaso dute, baina laguntza hau azken urte hauetan oso gutxi igo da, esan daiteke lehenengo urtean jasotzen zuten diru kopuru berdina jasotzen dutela. Urte hauetan zehar ezin bestekoa izan da bazkide eta gurasoen inplikazioa haur txokoa aurrera eramateko, beraiek jarri behar izan dute kasu askotan dirua gauza berriak erosteko.

Baina urterik urtera egoera okertzen joan denez, eraginak gaur egun tamalgarriak dira. Haur txokoko hezitzaileen egoera urterik urtera prekarioagoa da, beren soldatak gero eta baxuagoak dira. Diru falta honen beste eragin bat Egiako haurrek urtero igotzen den kuota ordaintzea da (aipatu beharra dago beste auzo batzuetan zerbitzu hau doan dela). Kuota igo behar denez, geroz eta ume gutxiago etortzen da. Bestalde, lokalaren azpiegitura urterik urtera okerrera doa, estufak,pertsianak...etab. aldatu behar dituzte. Instalazio elektrikoa zaharkituta dagoenez, automatikoa errez “saltatzen” da. Liburuak eta jostailuak erosteko ere dirua falta zaie. Esan dezakegu egoera ekonomiko larrian dagoela haur txokoa, aurten 6000 euroko defizitarekin hasi dute ikasturtea.

Arazo hauek lehenbailehen konpontzeko udalarekin bilera batzuk izan dituzte, bertan zera exigitu diote udalari: Haur txokoaren egitasmoa lehenbailehen lehiaketa publikora ateratzea. Antxeta elkarteak 16 urte hauetan guztietan zehar, auzoarentzat egindako lanak behar eta zor zaien onarpena jasotzea lehiaketari begira, Egiako haur txokoak ez du nahi auzoaren zerbitzuan daramaten denbora hau guztia ahaztea.

Azkenik lehiaketara atera bitartean duen azpiegitura eta egoera ekonomikoa hobetzea eskatzen diote Donostiako udalari.

Ander Edo eta Iker Pedrosa